Ձեր վստահելի աղբյուրը

Ռուսական «Մանկական ձայն» նախագծում  10-ամյա Միշա Գրիգորյանը շարունակում է հաջողություններ գրանցել: Նրա ձայնով  հիացած են ոչ միայն ժյուրիի անդամները, ողջ համացանցը ողողված է ստեփանակերտցի փոքրիկին ուղղված ջերմ խոսքերով:

«Գոլոս»-ի մանկական նախագծի 6-րդ եթերաշրջանի «մենամարտերի» ժամանակ  Միշան իր երկու թիմակիցների՝  Անդրեյ Կալաշովի և Ժան Մակիմի հետ երգեց Imagine Dragons–ի «Believer» ստեղծագործությունը և անցավ հաջորդ փուլ։

Նրանց մարզիչը`  երգիչ Վալերի Մելաձեն երեք տղաներից ընտրեց հենց Միշային:
Ժյուրիի անդամ Պելագեան փոքրիկների ելույթն անվանեց «մենամարտի մինի-ակումբ» և խոստովանեց, որ չի հասկանում, թե ում կարելի է ընտրել: Իսկ երգչուհի Սվետլանա Լոբոդան նշեց, որ բոլորն էլ հավասարաչափ լավն են։ Վալերի Մելաձեն ընտրեց Միշային:

Հիշեցնենք, որ  «Կույր լսումներ»-ի ժամանակ արցախցի փոքրիկը իսկական ֆուրոր արեց ռուսական «Գոլոս»-ի բեմում՝ կատարելով  Բրունո Մարսի «Versace on the Floor» երգը: Ելույթից հետո նա  ներկայացավ  հետևյալ կերպ. «Ես Միշա Գրիգորյանն եմ: Հայաստանից եմ, Ստեփանակերտից»:

Նրա ելույթի հետո Մելաձեն ասաց. «Պատրաստի արտիստ: Հիանալի երգում է, արտակարգ տեսք ունի, պարում է, խենթացնող է։ Նա ամեն ինչ կարողանում է»: Այնուհետև երգիչը հարցրեց. «Իսկ նման արտիստները շա՞տ են Ստեփանակերտում»: Միշան դրական պատասխան տվեց։
Դրանից հետո Միշան որպես մարզիչ ընտրեց Մելաձեին։

Նշենք, որ փոքրիկի՝ «Հայաստանից եմ, Ստեփանակերտից» խոսքերն իրարանցում  առաջացրեցին ադրբեջանական լրատվամիջոցներում: Ադրբեջանցիներին բարկացրել է այն, թե ինչպես է 10-ամյա երեխան ներկայացել մրցույթում:

Տեղեկացնենք, որ Միշան երգել սկսել է չորս տարեկանից, մեկ տարի անց արդեն «Արցախի ձայներ»-ի կազմում մեկնել է Ֆրանսիա, Գերմանիա։ 2016թ-ին ներկայացրել է Հայաստանը «Մանկական նոր ալիք» նախագծում, որտեղ զբաղեցրել է երկրորդ տեղը, 2017թ.–ին Միշան ներկայացրել է Հայաստանը «Մանկական Եվրատեսիլում» ու զբաղեցրել 6-րդ հորիզոնականը: