Հուշաքար՝ ի հիշատակ ապրիլյան պատերազմում զոհված ազատամարտիկ Նիկոլայ Օսիպյանի
Ազատամարտիկ, ապրիլյան քառօրյա պատերազմում զոհված Նիկոլայ Օսիպյանի մահվան տարելիցի կապակցությամբ այսօր հարազատները, մտերիմները, Արմավիրի մարզպետը, Էջմիածնի քաղաքապետը և պետական այլ պաշտոնյաներ այցելել են Զվարթնոց թաղամասի եղբայրական պանթեոն՝ հարգանքի տուրք մատուցելու ազատամարտիկի հիշատակին: Նիկոլայ Օսիպյանի շիրիմի մոտ տեղի է ունեցել նաև հոգեհանգստի արարողություն։
Արմավիրի մարզպետարանի կայքից տեղեկանում ենք, որ ապրիլյան քառօրյա պատերազմում զոհված ազատամարտիկի մահվան տարելիցի կապակցությամբ հուշաքար է տեղադրվել այն տան պատին, որտեղ նա ապրել է: Հուշաքարի բացման պատիվը վերապահվել է մարզպետ Համբարձում Մաթևոսյանին և Էջմիածնի քաղաքապետ Դիանա Գասպարյանին: Զոհվածի այրու նախաձեռնությամբ պատրաստված հուշաքարի վրա գրված է. «Այս տանը ապրել է ապրիլյան պատերազմի հերոս, ազատամարտիկ Նիկոլայ Սարգսի Օսիպյանը»:
Ողջունելով ներկաներին և իր խոնարհումը հայտնելով Նիկոլայ Օսիպյանի հիշատակին` մարզպետ Համբարձում Մաթևոսյանն ասել է, որ նա ակտիվ մասնակցություն է ունեցել արցախյան պատերազմին, միշտ կանգնած է եղել առաջնագծում, պայքարել է հանուն հայրենիքի, հանուն ընտանիքի, հանուն հող ու ջրի, հանուն պետականության և հանուն խաղաղության:
«Եվ երբ թվում էր, թե ամեն ինչ արդեն ավարտված է, հայրենիքի հանդեպ պարտքը մատուցված է` 2016 թվականի ապրիլ ամսին վրա հասավ չարաբաստիկ ապրիլյան պատերազմը: Եվ Օսիպյանը չկարողացավ հանգիստ նստել, մասնակցություն չունենալ ռազմական գործողություններին` գիտակցելով, որ թշնամուն պետք է լրջորեն հակազդել: Եվ նա դարձյալ մեկնեց սահման: Նրա մարտնչող ոգին նրան մղեց առաջնագիծ, և նա պայքար մղեց իր մարտական ընկերների հետ միասին: Ցավոք սրտի, քառօրյա պատերազմում մեր արյունոտ սահմանները գծվեցին նաև Նիկոլայ Օսիպյանի արյամբ: Եվ այսօր նրա և իր նման քաջերի շնորհիվ է, որ մենք ապրում ենք խաղաղության պայմաններում, ունենք կայուն, անսասան պետական սահմաններ և այդ ամենի համար մեր խորին շնորհակալությունն ենք հայտնում մեր հերոսներին և այս միջոցառմամբ էլ հիշում ենք մեծ մարդու մեծ սխրանքները:
Հավերժ հիշատակ և փառք ու պատիվ մեր հերոս ազատամարտիկին»,- նշել է մարզպետը:
Հուշաքարի բացման արարողությունից հետո մարզպետն այցելել է Նիկոլայ Օսիպյանի բնակարան, նրա հիշատակի անկյունում ծանոթացել հերոս ազատամարտիկի կենդանության օրոք և հետմահու ստացած կոչումներին և պարգևներին:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
