Ձեր վստահելի աղբյուրը

«Ինձ հետաքրքիր է, քանի տարբեր կարծիքներ կարող է ունենալ պետական մի մարմինը»,-մինչ քննությունը սկսելը լրագրողների հետ զրույցում հայտարարեց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը:

Լրագրողները նրանից  հետաքրքրվեցին ՀՔԾ պետ Սասուն Խաչատրյանի հայտարարության մասին: Խաչատրյանն ասել էր՝ Քոչարյանը պետք է շարունակի մնալ կալանքի տակ, հակառակ դեպքում կխոչընդոտի ճշմարտության բացահայտմանը:

«Օրինակ քննիչն այստեղ է ու պնդելու է այն տեսակետը, որ Ռոբերտ Քոչարյանն ազատության մեջ լինելով ոչ միայն կարող է խոչընդոտել քննությանը, այլև պնդում են, որ կարող է թաքնվել քննությունից: Դատախաությունը վերաքննիչ բողոք է բերել և պնդել է, որ պարոն Քոչարյանը ոչ միայն կարող է խոչընդոտել քննությանը, այլև կարող է  թաքնվել քննությունից: Պարոն Սասուն Խաչատրյանը հայտարարություն է անում ու նշում, որ պարոն Քոչարյանը կարող է խոչընդոտել քննությանը ու ոչինչ չի ասում այն պնդման մասին, որ կարող է իբր  թաքնվել քննությունից: Այսինքն դեռ իրար մեջ էլ չեն որոշել, թե ինչ են համարում»,-ասաց Ալումյանը:

Փաստաբանի պնդմամբ, իրականությունն այն է, որ Ռոբերտ Քոչարյանը ոչ կխոչընոդտի, ոչ էլ կթաքնվի քննությունից: Հիշեցրեց, որ դա հաստատված է համարել նաև ընդհանուր իրավասության դատարանը:

«Պարոն Քոչարյանը օգոստոսի 13-ից մինչև դեկտեմբերի 7-ը մնացել է ազատության մեջ և չի կատարել այնպիսի գործողություն, որից կարելի էր ենթադրել, որ նա մտադիր է խոչընդոտել քննությանը կամ թաքնվել դրանից: Այդ ամեն ինչը ասվում է՝ հանրության մոտ տպավորություն ստեղծելու համար: Իրականում նրանցից ոչ մեկ չի համարում, որ պարոն Քոչարյանը, մնալով ազատության մեջ, կարող է խոչընդոտել քննությանը: Այդ ամեն ինչն ասվում է հասարակությանը մոլորության մեջ գցելու և նրան կալանքի տակ թողնելու համար»,-պնդեց Ալումյանը:

Փաստաբանն ընդգծեց, կալանքի տակ մնալը կամ չմնալը չպետք է պայմանավորված լինի այն հանգամանքով, թե ժողովուրդն ինչ է մտածում այդ մասին:

«Բոլորս հարգում ենք ժողովրդի կարծիքը, և ժողովրդավարությունը բոլորիս համար մեծ արժեք է: Բայց ժողովրդավարությունն այն չէ, երբ ժողովուրդը որոշում է՝ էս մարդը մնա կալանքի տակ, կամ չէ»,-ասաց նա:

Վերաքննիչ քրեական դատարանում շարունակվում է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամսով երկարացնելու վերաբերյալ պաշտպանական խմբի ներկայացրած բողոքի քննությունը: 

ՀՀ երկրորդ նախագահ Ռոբերտ Քոչարյանը մասնակցել է նախորդ երկու նիստերին: Դրանց ընթացքում պաշտպանները ներկայացրել են երեք բողոքները: Պաշտպանական խմբի անդամ Արամ Օրբելյանը ավելի վաղ հայտնմել էր, որ ապրիլի 9-ի նիստում խոսքով հանդես կգա Ռոբերտ Քոչարյանը: