Ձեր վստահելի աղբյուրը

«Գիտեք, թե մեր երկրում կալանավորման հարցերը, ինչ կերպ են քննվում և Եվրոպական դատարան ինչքան վճիռներ կան ու դեռ ինչքան վճիռներ կլինեն»,-լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։

Նա համարում է, որ Հայաստանում կալանավորումների վատ ավանդույթ կա։

Հիշեցնենք, որ այսօր Վերաքննիչ քրեական դատարանը քննում էր Ռոբերտ Քոչարյանին կալանավորելու վերաբերյալ ընդհանուր իրավասության դատարանի որոշման դեմ պաշտպանների ներկայացրած բողոքը։

Փաստաբանի համոզմամբ, Հայաստանում դատարաններին առանձնապես չի հետաքրքրում, թե գործը նախաքննության ինչ փուլում է, գտնում են, որ քննությանը խոչընդոտելու հավանականությունը միշտ կա։

Ալումյանը վկայակոչում է ՄԻԵԴ վճիռները, որտեղ նշվում է, որ նախաքննության ավելի ուշ փուլերում խոչընդոտելու հավանականությունը փոքրանում է։

«Կան եվրոպական երկրներ, որ գործին խոչընդոտելն անձին կալանքի տակ պահելու հիմքերի թվում չէ, և ՄԻԵԴ-ն այդտեց որևէ վատ բան չի տեսնում»,-ասաց նա։

Անդրադառնալով տեսակցությունների արգելքի մասին հարցին, պաշտպանն ասաց՝ Քոչարյանին այցելում են ընտանիքի անդամները, բացառությամբ որդիներից մեկի՝ Սեդրակ Քոչարյանի: Հարցին, թե ինչո՞վ է պայմանավորված արգելքը, պաշտպանը խորհուրդ տվեց՝ հարցը տալ քննիչին:

Փաստաբանն ասաց, որ Քոչարյանի պաշտպանական խումբը չի հասցրել ծանոթանալ գործի բոլոր նյութերին,  ծանոթ են մոտ 70 տոկոսին։

«Մենք ծանոթ ենք դրա միայն մի մասին։ Հնարավոր չէր 50 օրվա մեջ 76 հատորին ոչ միայն ծանոթանալ, այլև ընթերցել։ Իսկ գործի նյութերում չկա անկարևոր բան»,-ընդգծեց նա։

Պաշտպանական խմբի անդամը հիշեցրեց, որ  միջնորդել են գործի նյութերին ծանոթանալու համար լրացուցիչ ժամանակ տալ, միջնորդությունը մերժվել է, բողոքարկել են դատախազին, վերջինն էլ մերժել է։

Հիմա խմբի մեկ այլ անդամ ՝ Հովհաննես Խուդոյանը դատարան է դիմելու։ Եթե դատարանն էլ չբավարարի հայցը, ապա Ալումյանն ահազանգում է, ի սկզբանե անհավասար պայմաններում են մտնելու դատական պրոցես, քանի որ դատախազները գործի նյութերին ծանոթանում են դեռ հուլիսից։

«Հետո ինչ կլինի, դեռ չգիտեմ»,-ասաց նա։

Հիշեցնենք, որ փետրվարի 15-ին հատուկ քննչական ծառայությունը հայտարարեց՝  2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով վարույթն իրականացնող մարմինը, համարելով, որ գործով ձեռք բերված ապացույցները բավարար են Հայաստանի Հանրապետության պաշտոնաթող նախագահ Ռոբերտ Քոչարյանի, ՀՀ զինված ուժերի գլխավոր շտաբի պետի պաշտոնը զբաղեցրած Սեյրան Օհանյանի, ՀՀ պաշտպանության նախարարի տեղակալի պաշտոնը զբաղեցած Յուրի Խաչատուրովի և ՀՀ նախագահի աշխատակազմի ղեկավարի պաշտոնը զբաղեցրած Արմեն Գևորգյանի վերաբերյալ մեղադրական եզրակացություն կազմելու և գործը դատարան ուղարկելու համար, վերը նշված անձանց մասով քրեական գործի նախաքննությունն ավարտել է: