Վանեցյանը՝ Սեդրակ Քոչարյանի անմեղության կանխավարկածը խախտելու վերաբերյալ դատարանի որոշման մասին

Իրավունք 14:39 10/04/2019 Հայաստան

Վանեցյանը՝ Սեդրակ Քոչարյանի անմեղության կանխավարկածը խախտելու վերաբերյալ դատարանի որոշման մասին

Երևան քաղաքի ընդհանուր իրավասության դատարանը՝ նախագահությամբ Արման Հովհաննիսյանի, ապրիլի 5-ին բավարարել է Սեդրակ Քոչարյանի պաշտպանների բողոքը և արձանագրել՝ ԱԱԾ-ի կողմից թույլ է տրվել անմեղության կանխավարկածի խախտում:

Լրագրողներն այսօր ԱԱԾ տնօրեն Արթուր Վանեցյանից հետաքրքրվեցին, համամի՞տ է դատարանի որոշման հետ։

«Ըստ դատարանի, խախտվել է անմեղության կանխավարկածը։ Հարցը կուսումնասիրեն իրավաբանները։ Սահմանված ժամկետում, եթե չի լինի որոշում, որ պետք է բողոքարկել վերաքննիչ դատարան, ուրեմն իհարկե, օրենքով նախատեսված բոլոր պահանջները կկատարվեն ու կենթարկվենք դատարանի որոշմանը»,-ասաց ծառայության տնօրենը։

Նա հիշեցրեց, ներողություն խնդրելու պահանջ չի եղել։

Հիշեցնենք, որ 2019 թվականի փետրվարի 19-ին Ազգային անվտանգության ծառայության կողմից պաշտոնական հաղորդագրություն էր տարածվել՝ «Սեդրակ Քոչարյանի վերաբերյալ քրեական գործով հաղորդագրություն» վերտառությամբ որում նշվում էր, թե բացահայտվել է առանձնապես խոշոր չափերով հարկեր չվճարելու և հանցավոր ճանապարհով ձեռք բերված եկամուտներն օրինականացնելու հանցադեպեր, որոնց կազմակերպման հետ անմիջական առնչություն է ունեցել ՀՀ երկրորդ նախագահ Ռոբերտ Քոչարյանի որդին՝ Սեդրակ Քոչարյանը:

Սեդրակ Քոչարյանի պաշտպանական խումբը գտել էր, որ հիշյալ հաղորդագրությամբ ԱԱԾ-ն խախտել է Սեդրակ Քոչարյանի անմեղության կանխավարկածը և բողոք էր ներկայացրել դատարան:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: