Ձեր վստահելի աղբյուրը

Բարձրագույն դատական խորհուրդը ամփոփում է գործունեության մեկ տարին։ Այս առթիվ կազմակերպած միջոցառմանը ներկա ՀՀ վարչապետ Նիկոլ Փաշինյանը նշեց. «Հայաստանում տեղի ունեցած ժողովրդավարական փոփոխությունները ինստիտուցիոնալ առումով ամրապնդելու համար առանցքային նշանակություն ունի անկախ դատական համակարգի գոյությունը։ Մենք ժողովրդավարության, օրինականության հարցում իսկապես կարևոր փոփոխություններ ենք արձանագրում, սակայն որպեսզի այդ փոփոխությունները ինստիտուցիոնալ առումով երաշխավորվեն, հարկավոր է, որ դրանք ունենան ինստիտուցիոնալ երաշխիքներ, որոնցից կարևորագույնը անկախ դատական համակարգն է»։

Նրա խոսքով՝ անկախության հռչակման առաջին օրից խոսում ենք անկախ դատական համակարգի մասին, բայց չենք կարողացել ունենալ այնպիսի համակարգ,  որ ապահովի արդարություն:
«Ես չեմ ուզում խոսել անցյալի մասին, այլ ցանկանում եմ խոսել այսօրվա և ապագայի մասին և  երաշխավորել մի բան, որ Հայաստանում հաստատված քաղաքական իշխանության համար իրապես անկախ դատական համակարգ ունենալը բացարձակ առաջնահերթություն է և այդ հարցն առաջին օրից եղել է մեր օրակարգում: Ուզում եմ ևս մեկ անգամ հավաստիացնել, որ ՀՀ կառավարությունը հրաժարվել է ենթադրաբար գոյություն ունեցած այն գործելակերպից, երբ քաղաքական, գործադիր իշխանությունը փորձում է որոշումներ պարտադրել կամ միջամտել դատական իշխանության գործունեությանը։ Եթե անգամ իշխանության տարբեր օղակներից հանկարծ կգտնվեն մարդիկ, ովքեր կփորձեն այս տրամաբանությունից դուրս գործել, նրանք փաստորեն գործում են ՀՀ կառավարության, ժողովրդի դեմ»,- ասաց Փաշինյանը։

Ինչ վերաբերում է դատական համակարգում առկա կոռուպցիոն դրսևորումներին՝ նա նշեց, որ Հայաստանի ոչ մի կոռումպացված պաշտոնյա չի կարող գիշերը հանգիստ քնել, անկախ նրանից՝ նախարար է, դատավոր է. « Նա պետք է իմանա, որ արդարադատությունը, եթե ոչ այսօր, եթե ոչ վաղը, ապա մյուս օրը անպայման գալու է իր հետևից: Այսօր մենք պատմական շանս ունենք Հայաստանում իսկապես ունենալ անկախ դատական համակարգ, այսօր, ըստ էության, չունենք որևէ քաղաքական խոչընդոտ այդ հաղթանակի համար, և հույս ունեմ, որ այսօրվա շանսը կօգտագործվի։ Եթե պարզվի, որ խանգարողներ չկան, մենք այդ նպատակին կհասնենք շատ արագ, արդյունավետ, իսկ եթե պարզվի, որ խանգարողներ կան, ստիպված պետք  է լինեն սկզբից լուծել խանգարողների հարցը, ապա նոր անկախ դատական համակարգի հարցը»։

Նա հույս հայտնեց, որ այսօրվա դատական համակարգում գոյություն ունի այն պոտենցիալը, որ մեզ կարող է բերել ցանկալի հանգրվանին։