168 ժամ. «Մեր սիրելի Աննա Հակոբյան, Արցախի հարցը Ձեր խելքի բանը չէ, դրանով զբաղվողներ կան». Զոհվածի մայր
«168 ժամ»-ը գրում է. «ԱՄՆ կատարած շրջագայության ընթացքում ՀՀ վարչապետի տիկին Աննա Հակոբյանն «Ամերիկայի ձայնին» հարցազրույց էր տվել, որտեղ անդրադարձել էր «Կանայք՝ հանուն խաղաղության» նախաձեռնությանը, որտեղ մասնավորապես նշել էր.
«Մենք խոսում ենք «Կանայք՝ հանուն խաղաղության» նախաձեռնության մասին, որի էությունը բնավ Ադրբեջանի կանանց դիմելը չէ։ Դա հընթացս տեղի ունեցավ։ Մենք դիմում ենք ոչ թե Ադրբեջանի կանանց, այլ ըստ էության դիմում ենք Ղարաբաղյան հակամարտության մեջ ներգրավված բոլոր երկրներին, կողմերին և միջնորդություն իրականացնող երկրներին։ Մեր կոչը նրանց մեկն է ընդամենը, որպեսզի հրադադարի ռեժիմը պահպանվի անբեկանելիորեն, որպեսզի չսպանեն սահմանը պահող երիտասարդ զինվորներին՝ ինչպես հայկական կողմից, այնպես էլ՝ Ադրբեջանի կողմից։
Այսինքն՝ մեր նախաձեռնության միակ իմաստը զինվորների կյանքը պաշտպանելն է և նրանց ուղղակի չզոհաբերելը հանուն ոչնչի, որովհետև հակամարտության պատմության այս տարիների ընթացքում բազմաթիվ զոհեր ենք ունեցել երկու կողմից էլ, հազարավոր զոհեր ենք ունեցել, բայց մենք նրանց կյանքը զոհաբերել ենք հանուն ոչնչի, որովհետև ոչ մի կերպ, ոչ մի սանտիմետր անգամ այդ զոհերը մեզ չեն մոտեցրել հակամարտության կարգավորմանը, եթե չասենք, որ հեռացրել են կարգավորումից, որովհետև պարզ բան է, հայտնի ճշմարտություն է, որ թշնամանքի մթնոլորտում չենք կարող խաղաղություն կառուցել, չենք կարող հակամարտության լուծում գտնել»։
Աննա Հակոբյանի այս հարցազրույցի հրապարակվելուց հետո համացանցում մեծ աղմուկ բարձրացավ, դրանց մեծ մասը վերաբերում էր այն նախադասությանը, որտեղ նշվում է, թե «զինվորները զոհաբերվել են հանուն ոչնչի»։
Այս քննարկումներից հետո Աննա Հակոբյանը ֆեյսբուքյան իր էջում գրել էր, որ իր հարցազրույցը կոնտեքստից դուրս են ներկայացրել. «Նույն հարցազրույցում և հայկական մյուս լրատվամիջոցներին և ամերիկյան երկու հեռուստաընկերություններին տված հարցազրույցերում ես մի քանի անգամ ասել եմ, որ «Կանայք՝ հանուն խաղաղության» արշավի կոչն է՝ պահպանել խաղաղությունը և խնայել երիտասարդ զինվորների կյանքերը: Բայց ես նաև ասել եմ, որ, եթե պատերազմ սկսվի, ոչ միայն Արցախի ՊԲ-ում ծառայող իմ որդին կլինի մարտական գործողությունների առաջնագծում, այլև ինքս եմ պատրաստ զենք վերցնել և պաշտպանել հայրենիքը: Իսկ դա նշանակում է՝ պատրաստ լինել նաև ԶՈՀՎԵԼ ՀԱՆՈՒՆ ՀԱՅՐԵՆԻՔԻ: Ուրեմն ինչպե՞ս կարող եմ ես հայտարարել, թե մինչև հիմա մեր զոհերը անիմաստ են եղել»։
Նրա այս գրառմանը հետևեց նաև ՀՀ վարչապետ Նիկոլ Փաշինյանի գրառումն իր ֆեյսբուքյան էջում, որտեղ վարչապետը գրել էր, որ Աննա Հակոբյանի ամբողջ ասածի էությունն այն է, որ հանուն ոչնչի զոհվում են ադրբեջանցի զինվորները, որոնք իրենց իշխանությունների հրամանով գրոհում են ԼՂ սահմանները, և ինչպես ցույց տվեց ապրիլյան քառօրյա պատերազմը, զոհվում են հանուն ոչնչի։
Չնայած այս պարզաբանումներին, այդուհանդերձ, քննարկումները չեն դադարում, հատկապես՝ որդեկորույս մայրերի շրջանում։
Այսօր մեր խմբագրություն էր զանգահարել Անուշ Հակոբյանը, ով 2016 թվականի հունվարին դիրքերում զոհված Արամայիս Ոսկանյանի մայրն է։ Նա խնդրում էր անպայման հրապարակել իր այս մտահագությունները:
Մեզ հետ զրույցում տիկին Անուշն ասաց, որ թե՛ Աննա Հակոբյանի, թե՛ վարչապետի բացատրություններն իրեն չեն հետաքրքրում, քանի որ վարչապետի տիկնոջ խոսքը հասկացել է այնպես, ինչպես նա ասել է։
«Ուզում եմ հիշեցնել, որ կանանց եվրասիական երկրորդ հանձնաժողովին վարչապետի տիկինը ներկայացել էր «Կանայք՝ հանուն խաղաղության» նախաձեռնությունը՝ հայտարարելով, որ զենքը պետք է զինապահեստ ուղարկել, որպեսզի այնտեղ ժանգոտվի։ Տիկին Աննա Հակոբյանը խաղաղասիրական կոչով բարձրացել էր նաև դիրքեր, փորձում էր այդպիսի խաղաղասիրական կոչերով լուծեր Արցախի խնդիրը։
Մեր սիրելի Աննա Հակոբյան, Արցախի հարցը Ձեր խելքի բանը չէ, դրանով զբաղվողներ կան, Դուք Ձեր հիմնադրամներով զբաղվեք։ Արցախը նոր խնդիր չէ, նոր թեմա չէ, որ այժմ ուզում եք խաղաղասիրական կոչերով հարց լուծել»,- նշեց տիկին Անուշը։
Որպես որդեկորույս մայր Անուշ Հակոբյանը Աննա Հակոբյանին հորդորեց անընդատ չկրկնել, որ չորս երեխաներ ունի, իսկ որդին ծառայում է Արցախում։
«Ես էլ չորս երեխաներ ունեմ, ես էլ մինուճար որդի ունեի, որն Արցախում էր ծառայում, ու հանուն Արցախի սահմանների պաշտպանության զոհվեց։ 30 տարի շարունակ որբ ու անապաստան երեխաներին եմ մայրություն արել, բայց որդուս մահից հետո այլևս ոչինչ չկարողացա անել։ Ես բազմիցս եմ ասել, որ Աննա Հակոբյանը Արցախի թեմայի հետ կապված չխոսի, մեր դեռ չսպիացած վերքերը նորից չբացի։ Ինչու չեն ուզում հասկանալ, եթե մեր տղաները չլինեին, հիմա Արցախը թշնամու ոտքի կոխան էր դարձել, ու ոսոխը մտնելու էր Հայաստան։
Որպես վարչապետի տիկին՝ Աննա Հակոբյանը միշտ սխալ է արտահայտվել Արցախի թեմայի հետ կապված։ Զարմանում եմ, ինչպես պետք է զենքը պահեստ ուղարկենք, եթե մեր դիմաց կանգնած է Ադրբեջանը։ Քանի դեռ Արցախի թեման կա, զենքը միշտ մեր ձեռքին պետք է լինի»,- ասաց Ա. Հակոբյանը»։
Մանրամասները՝ սկզբնաղբյուրում։
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
