Ձեր վստահելի աղբյուրը

«Ղարաբաղի հարցը խաղաղ միջոցներով կարգավորելու Հայաստանի պարտավորությունը ես վերահաստատեցի ևս մեկ անգամ այս ամբիոնից ելույթ ունենալով։ Վերջին շրջանում խաղաղության օրակարգը, բանաձևը կյանքի կոչելը մեր ամենակարևոր անելիքներից մեկն է։ Ուրախ եմ, որ մենք կարողացել ենք Ադրբեջանի նախագահի հետ բավականին ուղիղ, ազնիվ խոսակցություն ծավալել։ Ցավոք, դեռևս ընդհանուր պատկերացումներ չունենք Ղարաբաղի հարցի կարգավորման նրբությունների, մեխանիզմների վերաբերյալ, բայց այն, որ կարողացել ենք կառուցողական, անկեղծ քննարկումների մթնոլորտ ստեղծել, արդեն լավ է»,- ԵԽԽՎ-ում ասաց Նիկոլ Փաշինյանը՝ պատասխանելով հարցին, որ 2001թ․-ին անդամակցելով Եվրոպայի խորհրդին Հայաստանը խոստացել է զբաղվել Լեռնային Ղարաբաղի հակամարտության կարգավորմամբ, երբ է կյանքի կոչվելու այդ խոստումը։

Վարչապետը նշեց, որ այսօր մի քանի կարևորագույն խնդիր կա, որին պետք է պատասպանենք՝ խաղաղության օրակարգը ինստիտուցիոնալ առումով ուժեղացնելու համար, որոնցից մեկը ԵԱՀԿ Մինսկի խմբի ֆորմատի լիարժեք գործարկումն է, որը ենթադրում է նաև Լեռնային Ղարաբաղի ներկայացուցիչների մասնակցությունը կարգավորման գործընթացին։

«Շատ դժվար է հասկանալ, թե ինչպես ենք մենք պատրաստվում հարցը կարգավորել՝ առանց կոնֆլիկտի առաջնային ու հիմնական կողմին լսելու։ Մեր քայլերն ուղղված են նրան, որ ԵԱՀԿ Մինսկի խմբի շրջանակներում վերականգնենք երկխոսությունը Ադրբեջանի ու Լեռնային Ղարաբաղի միջև»,-ասաց Փաշինյանը, նշելով, որ նախկինում ԼՂ և Ադրբեջանի ղեկավարների միջև տեղի է ունեցել ուղիղ հանդիպում։

Նշվեց, որ ԼՂ ընտրված ներկայացուցիչնեը միշտ ներգրավված են եղել բանակցային գործընթացում մինչև անգամ 2018թ․-ը, քանի որ Ռոբերտ Քոչարյանը Հայաստանի նախագահ դառնալուց առաջ եղել է ԼՂ ընտրված նախագահը, այնուհետ Սերժ Սարգսյանն է ներկայացրել Հայաստանը, ով եղել է Ղարաբաղի առաջնորդներից մեկը։

«Մեր խնդիրն է այսօր ստեղծել պայմաններ, որ այդ երկխոսությունը ԼՂ ու Ադրբեջանի միջև չընդատվի։Եվ սա շատ կարևոր պարտավորություն է»,-ասաց Փաշինյանը։

Ղարաբաղի վերաբերյալ հարց ուղղեց նաև Թուրքիայի պատվիրակը, թե նրա ընտրությամբ հույս էր արթնացել ԼՂ խնդրի կարգավորման համար, սակայն ձևաչափի փոփոխության վերաբերյալ հայտարարությունները կարող են խնդիրներ առաջացնել և հույս հայտնեց, որ Փաշինյանը կարող է երկիրը խաղաղության տանել։

Նիկոլ Փաշինյանը մեկ անգամ ևս ընդգծեց, որ Հայաստանը բանակցային ֆորմատի փոփոխություն ոչ ակնկալում է, ոչ պահանջում և ֆորմատը ԵԱՀԿ Մինսկի խմբի համանախագահությունն է։

«ԼՂ մասնակցությունը բանակցային գործընթացին ոչ միայն ենթադրվել է, այլևս տեղի է ունեցել»,-ասաց Փաշինյանը՝ նշելով, Ադրբեջանի նախագահ Հեյդար Ալիևի հանդիպումը ԼՂ նախագահ Ռոբերտ Քոչարյանի հետ՝ ԵԱՀԿ Մինսկի խմբի ձևաչափով։

Փաշինյանն ասաց, որ ԼՂ մասնակցությունը քմահաճույք չէ, նախապայման չէ, այլ հակառակը, հարցն այն է, թե մենք ուզում ենք այն կարգավորել, թե ոչ։ Եթե ուզում ենք, ապա ինչպես կարելի է ԼՂ հարցը կարգավորել առանց ԼՂ-ի։

«Հաճախ օգտագործվում է օկուպացիա բառը, բայց այն մարդիկ, ովքեր այսօր ապրում են Ղարաբաղում, ծնվել են այնտեղ, նրանց պապերը, պապերի պապերն են ապրել Ղարաբաղում։ Ինչպ՞ս կարող է մարդն օկուպացնել այն տարածքը, որտեղ ինքը ծնվել է, իր երեխան է ծնվել և որտեղ հուղարկավորված են իր նախնիները»,-ասաց Փաշինյանը, նշելով, որ առաջարկում են նստել սեղանի շուրջ՝ կոնֆլիկտի բոլոր կողմերով, ու համաձայնել, որ խոսում են ոչ թե հարցի չկարգավորման, այլ կարգավորման և որ «մեր օրակարգը ոչ թե իրար ոչնչացնելու, այլ հարցերը կարգավորելու օրակարգ է՝ ինչպես հարիր է 21-րդ դարի դարի մարդկանց, ԵԽ անդամ երկու երկրների»։