Ձեր վստահելի աղբյուրը

ԱԺ նախագահ Արարատ Միրզոյանը «Իմ քայլը» խմբակցության աշխատանքը դրական է գնահատում։

«Խորհրդարանական մեծամասնությունը բավականին լուրջ աշխատանք է իրականացնում»,- այս մասին այսօր խորհրդարանում լրագրողների հետ զրույցում ասաց ԱԺ նախագահը։

Դիտարկմանը, թե ընդդիմությունը հակառակն է պնդում, ասում է՝ «գործ արեք», Արարատ Միրզոյանն արձագանքեց. «Ընդդիմությունը  շատ բան կարող է ասել, ընդդիմությունը բերում է մի առաջարկ, որ թե ինքը լինի կառավարություն և այդ առաջարկն ընդունի, տեսնենք ոնց են աշխատելու: Իսկ որոշ դեպքերում բերում է ռացիոնալ առաջարկներ, որոնք դրական արձագանք են գտնում մեծամասնության կողմից»։

Նա միաժամանակ ասաց, որ  ընդդիմության բազմաթիվ նախաձեռնություններ արժանացել են դրական վերաբերմունքի, դարձել են օրենք:

«Իսկ այդպիսի բան կա՞, որ ընդդիմության օրենսդրական բոլոր նախաձեռնությունները պետք է դառնան օրենք, որ մեծամասնությունը պիտի կողմ քվեարկի: Նույնիսկ մեծամասնության բոլոր առաջարկները չեն դառնում օրենք»,- ընդգծեց Արարատ Միրզոյանը։

Ըստ նրա՝  տարբեր շրջանակների կողմից միտում կա փորձել չտեսնել լավը և նույնիսկ որոշ դեպքերում ավելացնել ոչ հավաստի ինֆորմացիան, կամ եղածն այլ կերպ ներկայացնել. «Չգիտե՞ք, որ այդ մանիպուլյացիաները շարունակվում են»։