Ձեր վստահելի աղբյուրը

Ադրբեջանի արտաքին գործերի նախարարությունը հայտարարել է լրագրողների երկկողմ այցերի թույլտվության վերաբերյալ Մոսկվայում Հայաստանի և Ադրբեջանի արտգործնախարարների միջև նախօրեին ձեռք բերված պայմանավորվածությունների կատարման պատրաստակամության մասին: Այս մասին գրել է «КоммерсантЪ»-ը։

«Բաքուն միշտ վճռական է եղել ստեղծել այնպիսի պայմաններ, որոնք կնպաստեն Ադրբեջանի և Հայաստանի հասարակությունների միջև փոխըմբռնման մթնոլորտի ձևավորմանը և ամրապնդմանը»,- ասել է Ադրբեջանի ԱԳՆ մամլո խոսնակ Լեյլա Աբդուլաևան, պատասպանելով հարցին, թե արդյոք Ադրբեջանը պատրաստ է իր տարածքում ընդունել հայ լրագրողներին։

Ադրբեջանի ԱԳՆ մամլո խոսնակը նաև նշել է, որ Բաքուն չի խոչընդոտի քաղաքացիների այցերը հակամարտող երկրներում բանտարկված հարազատներին տեսակցելու համար:

«Ադրբեջանի իշխանությունները երբեք խստագույն արգելքներ չեն պարտադրել Հայաստան և մեր օկուպացված տարածքներ քաղաքացիների այցելության համար: Նման ուղևորություններից զերծ մնալը կապված է միայն ադրբեջանցիների անձնական անվտանգության հետ: Սակայն իրավիճակը կարող է փոխվել, եթե հայկական կողմը ապահովի համապատասխան անվտանգության երաշխիքներ», - ասել է Աբդուլաևան: 

Նշվում է, որ ՀՀ ԱԳՆ ներկայացուցիչն էլ «КоммерсантЪ»-ին ասել է, որ Հայաստանի ու Արցախի իշխանությունները չեն խոչընդոտի ադրբեջանցի բանտարկյալների հարազատների այցերին։

Հիշեցնենք, որ նախօրեին՝ ապրիլի 15-ին, Մոսկվայում հանդիպեցին Հայաստանի, Ադրբեջանի ու Ռուսաստանի արտաքին գործերի նախարարները։ Հանդիպմանն անյուհետ միացել էին ԵԱՀԿ Մինսկի խմբի համանախագահներն ու ԵԱՀԿ գործող նախագահի անձնական ներկայացուցիչը։

Հանդիպման արդյունքներով ընդունվել է  համատեղ հայտարարություն, որում ասվում է, որ հանդիպման մասնակիցները քննարկել են իրադրությունը սահմանին և շփման գծում, ինչպես նաև հումանիտար ոլորտում փոխգործակցության հաստատման հեռանկարները։

Ընդգծվել է շահագրգռվածությունը հակամարտության գոտում իրադրության հետագա կայունացման ուղղությամբ, մասնավորապես գյուղատնտեսական աշխատանքների ժամանակաշրջանում: Նրանք նաև պայմանավորվել են փոխադարձության հիման վրա միջոցներ ձեռնարկել թույլատրելու կողմերի տարածքում կալանքի մեջ գտնվող անձանց հարազատների այցերը: Նախարարները պատրաստակամություն են հայտնել գործնական միջոցներ ձեռնարկել մարդկանց միջև շփումների հաստատման ուղղությամբ, այդ թվում ԶԼՄ-ների ներկայացուցիչների փոխադարձ այցելությունների միջոցով: