ՍԴ-ի կողմից կայացրած որոշումների հետ շատ հաճախ համաձայն չեմ. Գոռ Հովհաննիսյան
Խորհրդարանում Սահմանադրական դատարանի դատավորի ընտրության հարցի քննարկման ժամանակ դիմելով թեկնածու Գոռ Հովհաննիսյանին՝ «Իմ քայլը» խմբակցության ղեկավար Լիլիթ Մակունցը հայտնեց, որ նամակ է ստացել «Իրավունքի Եվրոպա» իրավապաշտպան ՀԿ-ից, որը դիտորդական իրավունք է իրականացնում ՀՀ-ում Սահմանադրական դատարանի թափուր պաշտոնի համալրման գործընթացի նկատմամբ։
Ըստ նրա՝ նամակում նշվել են մի շարք դրույթներ, որոնք մտահոգության առարկա են, մասնավորապես՝ խոսքը փաստաթղթերի ոչ համապատասխանության կամ բացակայության մասին է:
«Ըստ ձեր նշված կենսագրական թերթիկի՝ ԵԱՀԿ երևանյան գրասենյակի հետ կնքված պայմանագրով Դուք աշխատել եք 2 տարի մեկ ամիս: Նշված կազմակերպությունը հարցում է ուղարկել ԵԱՀԿ երևանյան գրասենյակ և պատասխանել են, որ Դուք այդ նշված պայմանագրի սահմաններում աշխատել եք 30 օր»,- նշեց Լիլիթ Մակունցը:
Ի պատասխան Գոռ Հովհաննիսյանն ասաց, որ, հավանաբար, խոսքը ոչ թե ԵԱՀԿ-ի, այլ Եվրախորհրդի հետ պայմանագրի մասին է. «ԵԱՀԿ-ի հետ աշխատել եմ 2016թ-ի օգոստոսին, իսկ ԵԽ-ի հետ երկար եմ աշխատել»:
Նրա խոսքով՝ իրականում պայմանագրում նշվում է, որ վարձատրությունը տրվում է ինչ-որ օրերի քանակով, բայց թե, փաստացի, մարդն ինչքան է աշխատում օրենսգրքի նախագծի վրա, դա ոչ մի կապ չունի պայմանագրում նշված վարձատրության օրերի քանակի հետ:
«Ես 2014 թվականի նոյեմբերից մինչև 2016 թվականի ապրիլը զբաղվել եմ Վարչական իրավախախտումների մասին օրենսգրքի նախագծի մշակման աշխատանքներով։ Այսինքն՝ ես, փաստացի, աշխատել եմ շատ ավելին, քան պայմանագրում նշված օրերի քանակն է, որոնց հիման վրա հաշվում է աշխատանքի վարձատրությունը: Խնդիրը միայն դրա մեջ է»,- ընդգծեց Գոռ Հովհաննիսյանը:
Լիլիթ Մակունցն էլ նշեց, որ որպես իրավաբան՝ Գոռ Հովհաննիսյանը գիտի, որ Հայաստանում գործող բոլոր կառույցները, այդ թվում՝ միջազգային կազմակերպությունները, աշխատում են ՀՀ Սահմանադրության ու Աշխատանքային օրենսգրքին համապատասխան, և չի կարող աշխատողն աշխատել ավելին, այսինքն՝ շահագործվել և չստանալ դրան համապատասխան վարձատրություն:
«Այստեղ ինձ համար մտահոգիչ բան կա»,- ընդգծեց պատգամավորը։
Սահմանադրական դատարանի դատավորի թեկնածուն արձագանքեց. «Խնդիրն այն չէ, թե ինձ շահագործել են, խնդիրն այն է, թե ինչպես է հաշվարկվում վարձատրությունը։ Ես էլ լավ չեմ պատկերացնում, թե այդ 40 օրն ինչպես է հաշվարկվել, բայց հասկացել եմ, որ միջազգային կազմակերպությունների հետ պայմանագրերում օրերով է որոշվում, թե ինչպես է վարձատրվում մարդը: Ես կարող եմ ապացուցել, որ մասնակցել եմ բոլոր գիտաժողովներին, որոնք տեղի են ունեցել 2014 թ-ի նոյեմբերին, 2016 թ-ի մարտին: Այդ ամբողջ ընթացքում ես մշակել եմ «Վարչական իրավախախտումների մասին» օրենսգրքի երեք գլուխ: Փորձառությունս ցույց է տալիս, որ հնարավոր չէ 40 օրում այդքան ահռելի աշխատանք կատարել»:
«Լուսավոր Հայաստան» խմբակցության պատգամավոր Արման Բաբաջանյանն էլ հետաքրքրվեց, թե ինչպես է վերաբերվում ՍԴ նախկին և ներկա այն անդամներին և դատավորներին, որոնք կայացրել են արատավոր և ամոթալի որոշումներ և ընտրվելու դեպքում ինչպես է պատրաստվում փոխել իրավիճակը։
Գոռ Հովհաննիսյանը նշեց, որ ՍԴ-ի կողմից կայացրած որոշումների հետ ինքն էլ շատ հաճախ համաձայն չէ։
«Իրավագիտությունը մեկնաբանման գիտություն է, հետևաբար, ամեն մարդ կարող է իր գնահատականը տալ։ Ես կարող եմ բազմաթիվ որոշումներ նշել, որոնց հետ համաձայն չեմ և համարում եմ, որ Սահմանադրական դատարանը կոպիտ խախտում է թույլ տվել»,- ասաց նա։
Հարակից հրապարակումներ`
- Ձեր հարցին պատասխանելու համար պետք է նստեմ և հասկանամ, թե ինչ իրավիճակ է երկրում. Գոռ Հովհաննիսյան
- Երբեք քաղաքական որևէ կուսակցության չեմ հարել. ՍԴ դատավորի թեկնածու
- ՍԴ դատավորի թեկնածու Գոռ Հովհաննիսյանը հանդիպել է «Իմ քայլի» պատգամավորների հետ
- Նախագահը ՍԴ դատավորի թափուր տեղի համար առաջադրել է Գոռ Հովհաննիսյանի թեկնածությունը
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
