Ձեր վստահելի աղբյուրը

ՊՊԾ գնդի գրավման ժամանակ սպանված ոստիկան Յուրի Տեփանոսյանի այրին՝ Արփինե Թումասյանը, դեպքի մասին տեղեկացել է հեռուստատեսությամբ, այդ պահին եղել է աշխատանքի վայրում։ Սակայն մինչ դեպքը նա զրուցել է ամուսնու հետ։  Երևանի ընդհանուր իրավասության դատարանի Շենգավիթի նստավայրում «Սասնա ծռեր» խմբի 10 անդամների գործով դատական նիստում հայտնեց Թումասյանը, որը հարցաքննվեց որպես  տուժողի իրավահաջորդի ներկայացուցիչ։

«Համածառայակիցները հայտնել են, որ մեքենան գնալու ժամանակ է այդ դեպքը տեղի ունեցել։ Ընթացքի մեջ է եղել մեքենան, որ կրակոցը եղել է։ Սակայն մինչ այդ հեռախոսով խոսում էր ինձ հետ, ասաց մի րոպե. «Այ տղա, Ազատիկ, վեր կաց գնա ղեկին նստի, ես պետք է հետևը պառկեմ հանգստանամ»։ Նա խանութից  հոգնած էր գնացել։ Այդքան բան, որ չասեն իրեն զոռով են նստացրել հետևը, որ դիտավորյալ սպանություն լինի կամ ինչ-որ բան»,- ասաց սպանված ոստիկանի այրին։

Նշենք, որ Յ. Տեփանոսյանի հայրը՝ Վահրամ Տեփանոսյանը, հայտարարել է, որ իր որդուն սպանել են ոստիկանները, իսկ հարսն այն կարծիքն է, որ «Սասնա ծռեր» խմբի անդամներն են սպանել։ Յ. Տեփանոսյանի սպանության մեջ մեղադրվում է  «Սասնա ծռեր» խմբի անդամ Սմբատ Բարսեղյանը։ Այսօր դատարանը բավարարեց և  Վ. Տեփանոսյանը  կկանչվի հարցաքննության։

Մեղադրողի հարցին, թե ձեր ամուսնու հայրը պնդում է, որ Յ. Տեփանոսյանը խնդիրներ է ունեցել վերադասի հետ, Ա. Թումասյանն ասաց. «Եթե վերադասի հետ խնդիրներ ունենար, մենք ընտանիքներով չէինք շփվի իրար հետ։  Հրամանատար Գուրգեն Գրիգորյանի ընտանիքի հետ միջոցառումների էինք մասնակցում։ Գուրգեն Գրիգորյանը պետք է մեր երեխաների քավորը դառնար»։

Հարցին, թե ե՞րբ է սկսել Վ. Տեփանոսյանը նման հայտարարություններ անել, տուժողի իրավահաջորդն ասաց. «Երբ այս մարդկանց բաց թողեցիք բանտից։ Դրանից հետո մեր ընտանիքը գլխիվայր շուռ եկավ։ Հերիք չէ ընտանիքս քանդվեց  իրենց ձեռքով, հիմա էլ ընտանեկան հարաբերությունների վրա սկսեցին ազդել։ Մինչ այդ Վահրամ Տեփանոսյանը շատ հանգիստ էր, բոլորդ էլ տեսնում էիք նրա դիրքորոշումը։ Մողեսի պես մտան մեր ընտանիք։ Երեք երեխա է որբացել, թող գա մեկը տեսնի իմ երեխաների հոգեվիճակը»։

«Մենք ընտանիք չենք քանդել»,- արձագանքեց ամբաստանյալներից մեկը։

«Բա ո՞վ է քանդել, կողքիդ նստած անասունն է քանդել»,- պատասխանեց Ա. Թումասյանը։

Նաև նշեց, որ երեխաների հետ առանձին է ապրում, սկեսրայրի հետ այդքան լավ հարաբերություններ չունի։

Ա. Թումասյանն այժմ աշխատում է ոստիկանությունում՝ որպես ինֆորմացիոն բաժնի ավագ տեսուչ։

Նախագահող դատավոր Մեսրոպ Մակյանի հարցին՝ հնարավո՞ր է ոստիկանության ղեկավարության կամ ձեր անմիջական ղեկավարության կողմից կա որևէ ճնշում ձեր նկատմամբ  դատարանում այսպիսի ցուցմունքներ տալու հետ կապված, նա ասաց. «Ո՞նց կարող է տենց բան լինի։ Երեք երեխա ունեմ, ոնց կարո՞ղ են ճնշում գործադրեն, այստեղ ցուցմունք տամ, 10-20 տարի հետ երեխաներին պետք է պատասխան տամ։ Ոչ մեկ չի կարող ինձ վրա ճնշում գործադրել»։ 

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։