Ձեր վստահելի աղբյուրը

Նոտղը Դամի վանահայրը հայտարարել է, որ  փարիզյան տաճարը «հինգ-վեց» տարով փակվում է։ Այս մասին գրում է Գազետա.ռու կայքը՝ հղում անելով Associated Press-ը։ Նա նշել է, որ հրդեհի հետևանքով տաճարի մի մասը «շատ թուլացել է», բայց չի հստակեցրել, թե խոսքը կոնկրետ որ հատվածի մասին է։

Վանահոր խոսքով, ներկա պահին անհայտ է, թե այդ ընթացքում որտեղ են աշխատելու տաճարի 67 աշխատակիցները։

Տաճարում հրդեհը բռնկվել էր ապրիլի 15-ին, ինչի հետևանքով փլվել է տաճարի աշտարակը, ժամացույցը։ 

Փարիզի Աստվածամոր տաճարը սկսել են կառուցել 1163 թ. Սուրբ Ստեփանոսի բազիլիկ եկեղեցու տեղում, որն իր հերթին հիմնվել էր հեթանոսական Յուպիտերին նվիրված տաճարի վրա։ Կառուցումը տևել է մոտ 200 տարի։ 1991 թվականին տաճարն ընդգրկվել է ՅՈՒՆԵՍԿՕ-ի համաշխարհային ժառանգության ցանկում։

Փարիզի Աստվածամոր տաճարը Փարիզի թեմի առաջնորդանիստ տաճարն է: Յուրաքանչյուր տարի ավելի քան 12 միլիոն մարդ այցելում է տաճար, այդ իսկ պատճառով այն համարվում է Փարիզի ամենաշատ այցելվող հուշարձանը: Տաճարի մուտքային մասը բաղկացած է երեք կամարներից։ Մեջտեղինը պատկերում է Ահեղ դատաստանը։ Բարձրության վրա պատկերված է Հիսուսը, իսկ նրա կողքերում առաքյալներն են, 6-ը՝ աջից, 6-ը՝ ձախից։ Ձախ կամարը նվիրված է Տիրամորը, աջը՝ Սուրբ Աննային։ Վերևում Բիբլիական թագավորներն են։ Կենտրոնում Վարդն է, Տիրամայրը Սրբերի հետ։