Ձեր վստահելի աղբյուրը

Կառավարության կառուցվածքի մասին օրենքի նախագծի քննարկման ժամանակ «Լուսավոր Հայաստան» խմբակցության պատգամավոր Գևորգ Գորգիսյանը հիշեցրեց. «Ուղիղ մեկ տարի առաջ էր, երբ այս նույն ամբիոնից Դավիթ Հարությունյանն ասում էր՝ դե մենք մեծամասնություն ենք, կառավարությունը գիտի ինչ է անում, դուք գործ չունեք։ Հիմա այսօր նույն բառերն ասում է պարոն Զեյնալյանը, հետո կրկնում է մեր գործընկեր Վահագն Հովակիմյանը։

Պարոն Զեյնալյանն ասում է՝ կառավարությունն ընտվել է ժողովրդի կողմից, վայելում է ժողովրդի վստահությունը, պարոն Հովակիմյանն ասում ՝ կառավարությունը ոնց որոշի։

Հարգելի գործընկերներ, միակ ընտրված մարմինը Ազգային ժողովն է, և որոշողը ԱԺ-ն է, դրա համար եք դուք եկել Ազգային ժողով՝ ներկայացնելու նախագիծը։ Եվ եթե խմբակցություններն ունեն իրավունք ներկայացնելու առաջարկ, ապա պարոն Զեյնալյան, չի կարելի ասել՝ մենք չենք ուզում քննարկել ձեր առաջարկները, Դուք պարտավոր եք քննարկել կետ առ կետ և պարտավոր եք հիմնավորել, թե որ կետին ինչի համար եք դեմ, իսկ այդպիսի քննարկում, պարոն Հովակիմյան, ձեր հանձնաժողովում չի եղել։ Այո, պարոն Մարուքյանը շատ գեղեցիկ ձևով ներկայացրել է մեր մոտեցումները, բայց կա տեղեկանք, որտեղ հատ-հատ գրվում են օրենքի հոդվածների վերաբերյալ մեր առաջարկները, և նման քննարկում տեղի չի ունեցել»։

Անդրադառնալով կոնկրետ նախագծին՝ Գորգիսյանն ասաց, որ հիմնական կարևորագույն բաղադրիչը բացակայում է՝ կարիքների և ազդեցության գնահատականը։

«Պարոն Զեյնալյան ինչքան էլ կառավարությունն է ամեն ինչի համար պատասխանատու, եթե չկա կոնկրետ անձ կոնկրետ խնդրի համար պատասխանատու, գործում է կոլեկտիվ անպատասխանատվություն և որևէ մեկից վաղը մենք չենք կարող պահանջել որպես վերահսկող խորհրդարան՝ պարոնայք, ինչու մեզ մոտ չի զարգանում նորարարությունը, ինչու տեխնիկական վերազինում տեղի չի ունենում, այս ամենի համար պետք է լինի գոնե մեկ քաղաքական պատասխանատու։

Մեկ տարի առաջ պարոն Փաշինյանը մեզ հետ քննադատում էր, որ կառավարության կառուցվածքում կան մարմիններ, որոնք դուրս են վերահսկողությունից ԱԺ-ի։ Հիմա ուժայինները թողնենք մի կողմ, մի հատ էլ Սփյուռքի նախարարությունը հանվում է տանում-մտցվում վարչապետի աշխատակազմ, կրկին խորհրդարանական վերահսկողությունից դուրս և ոչ մեկ չգիտի ինչով է զբաղվելու այդ մարդը, գիտի միայն վարչապետը, դե ինչով ասի դրանով էլ կզբաղվեն։ Եվ այսպիսին է խորհրդարանական մեր երկրի իրականությունը»,- ասաց ԼՀԿ պատգամավորը։

Խոսելով կրթության և գիտության նախարարությունից, նա նշեց. «Սիրելիներս, մենք կրթության ոլորտում հենց հիմա ունենք ահռելի խնդիրներ, բառացիորեն օրերս դպրոցի դասատուները ցուցմունք են տալիս, թե ինչպես է եղել, որ դասի ընթացքում հղիացել է երեք աշակերտ, մենք ունենք այդ կարգի խնդիրներ արդեն կրթական ոլորտում, այնքան են արժեզրկվել ու հեղինակազրկվել ուսուցիչները, որովհետև նախարարը նրանց անվանում է ընտրակեղծարար, տնօրենը ծնող է կանչում, ծնողը գալիս է տնօրենի սենյակից զանգում նախարարին, հեռախոսը փոխանցում է տնօրենին, փոխանակ նախարարը պարզի թե ինչ է պատահել, որ ծնող են կանչել, սկսում է մուննաթ գալ տնօրենի վրա։

Այս իրավիճակով, ունենալով այսքան մեծ խնդիրներ մի նախարարությունում, որտեղ գերկարևոր է երկրի համար, միացնում ենք ևս մեկը, որը կրկին հարուստ է խնդիրներով»։

Վերջում պատգամավորն իր խոսքն ուղղեց վարչապետին. «Կրկին Սերժ Սարգյանի հագով կարված կոստյումի համար, պարոն վարչապետ, շատ եմ խնդրում, հանեք այդ կոստյումը, որովհետև այն ոչ միայն Ձեզ չի սազում, այլև արդեն Ձեր թիմակիցները, ամենափորձառուները, Ձեր կուսակցության վարչության անդամները հարցին պատասխանելիս հղում են անում Ձեզ, ասում են մենք չգիտենք, պարոն Փաշինյանին հարցերը տվեք, սա էլ է վատ հիշողություններ ու դեժավյու»։