Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանն օրեր առաջ հայտարարեց, եթե դատախազությունը նախկին ընդդիմադիր յոթ գործիչների նկատմամբ դադարեցրել է քրեական հետապնդումը, ապա պետք է նույնը լինի այսօր՝ Ռոբերտ Քոչարյանի նկատմամբ։ Հակառակ դեպքում, ըստ Ալումյանի, պետք է յոթի գործը վերաբացվի։

Լրագրողներն այսօր գլխավոր դատախազ Արթուր Դավթյանից հետաքրքրվեցին, պատրաստվո՞ւմ է դատախազությունը վերաբացել այն։

Ի պատասխան գլխավոր դատախազը խնդրանք ուղղեց փաստաբաններին մատնանշել դատախազության նախկին որոշումը, որով քրեական հետապնդումը դադարեցվել է պատասխանատվությունը խստացնող դրույթի փոփոխությամբ։

«Բացարձակ այդ որոշման մեջ չկա որևէ մեկնաբանություն։  Մեր մեկնաբանությամբ, մեր ընկալմամբ, նոր օրենքը ոչ մի կերպ խստացնող օրենք չէ։ Եվ 2009 թ. դատախազների որոշման մեջ էլ որևէ մեկնաբանություն, պարզաբանում չկա, թե դա ինչ է դիտարկվել»,-ասաց Արթուր Դավթյանը։

Գլխավոր դատախազը միաժամանակ պնդեց,  իրավական մեկնաբանություններն աքսիոմա չեն, եթե տրված լինեին ինչ-որ մեկնաբանություններ, դրանք կարող են փոխվել։

«Այսօր նույնիսկ Վճռաբեկ դատարանը պարբերաբար դիրքորոշումներ ու մեկնաբանություններ է փոխում, նույն նորմի մեկնաբանություններ։ Կա նաև երրորդ հարցը։ Պաշտպանն ասում է, եթե այդ մեկնաբանությունն է, ուրեմն թող վերաբացեն յոթի գործը։ Ուրեմն ինձ չի թվում, որ իմ գործընկերը չգիտի, որ անհիմն, անօրինական քրեական հետապնդում չիրականացնելու որոշումները կարող են վերանայվել բացառապես գլխավոր դատախազի կողմից վեցամսյա ժամկետում։ Իսկ դրանից անցել է ինը տարի, դատավարական ժամկետներն անցել են»,-նշեց նա։

Հիշեցնենք, որ խոսքը վերաբերում է Քրեական օրենսգրքի 300.1 հոդվածին՝ Սահմանդրական կարգը տապալելը, որը փոփոխվել է 2009-ին։ Ալումյանը համարում է, որ օրենքի այդ դրույթը վիճակը վատթարացնող է ու հենց այդ հիմնավորմամբ  մարտի 1-ի գործով անցնող յոթ գործիչների նկատմամբ դարադարեցվել է քրեական հետապնդումը։

«2008 թ. սահմանադրական կարգի տապալման մեղադրանք էր առաջադրված 7 հոգու՝ մարտի մեկի իրադարձությունների առավել ակտիվ մասնակիցների՝ Ալեքսանդր Արզումանյան, Հակոբ Հակոբյան, Սուրեն Սիրունյան, Շանթ Հարությունյան և էլի անձինք:

Հետո 2009 թ. համապատասխան հոդվածը Քրեական օրենսգրքի 300 հոդվածն էր այն ժամանակ սահմանադրական կարգի տապալումը, այդ ժամանակ հոդվածը փոխվեց, և սահմանադրական կարգի տապալումը հիմա՝ 2009 թ. սկսած, նախատեսված է 300.1 հոդվածով: Նշված յոթ հոգու նկատմամբ քրեական հետապնդումը սահմանադրական կարգի տապալման մեղադրանքով դադարեցվեց այն պատճառաբանությամբ, որ 300.1 հոդվածը խստացնում, վատացնում է անձի վիճակը համեմատ 2008 թ. գործող օրենքին, և հետևաբար քրեական իրավունքի հանրաճանաչ սկզբունքից ելնելով, որ պատասխանատվությունը,   խստացնող օրենքը չի կարող կիրառվել անձի նկատմամբ այն  արարքի համար, որը կատարվել է մինչև այդ խստացումը, դրա համար այդ 7 հոգին խուսափեցին քրեական պատասխանատվությունից:

Քրեական հետապնդումից խուսափեց նաև Նիկոլ Փաշինյանը, ով  հետախուզման մեջ էր գտնվում, բայց հետո հայտնաբերվեց, երբ այս օրենսդրական  փոփոխությունն արդեն եղել էր և նրան էլ հենց նույն պատճառով սահմանադրական կարգի խախտման մեղադրանք չառաջադրվեց»,-լրագրողների հետ հանդիպմանն ավելի վաղ մանրամասնել էր փաստաբանը։