Ձեր վստահելի աղբյուրը

Խորհրդարանում «Լուսավոր Հայաստան» խմբակցության պատգամավորն իր ելույթում հայտարարեց, որ «Պետական տուրքի մասին» ՀՀ օրենքում լրացում կատարելու մասին և կից ներկայացված օրինագիծն ընդունվելու դեպքում վերջնական ազդեցություն է ունենալու քաղաքացիների կյանքի որակի վրա, շինարարության վրա, հետևաբար նաև ՀՆԱ-ի աճի վրա։

«Այստեղ պետք է զերծ մնանք քաղաքական տարբեր տեսակի էմոցիոնալ տեքստերից և շահերից, որոնք այսօր բախվում են դահլիճում, և քննարկենք` ինչպես և ինչու։ Պետք է այնպիսի մոդել մտածել, որը հետագայում ևս լուծումներ պարունակի, քանի որ տարբեր ձևաչափերով նման խնդիրների պետք է առնչվենք, արդյոք պետք է պաշտպանենք տեղական արտադրողին, թե մրցակցությունը և արդյունքում էժան ու որակյալ արտադրանք ունենալը»,- նշեց պատգամավորը։

Նա ներկայացրեց, որ պետտուրքի միջոցով ներմուծման վճար է սահմանվում, մինչդեռ պետտուրքը ծառայությունների համար պետք է սահմանվի, և այս հարցը որևէ աղերս չունի պետական տուրքի օրենքի հետ, և կարելի էր այս որոշումը հարկային լուծումների միջոցով լուծել։

«Պետական տուրքը որևէ ծառայություն մատուցելու դիմաց է սահմանվում, բայց այստեղ չկա ծառայության մասին խոսքը։ Ապրիլի 1-ից չի կարող վատթարացնող նորմը մտնել ուժի մեջ, առնվազն հունվարի 1 պետք է լինի։ Նաև չի նշվում, թե էական ինչ ավելացում կունենա բյուջեի համար այս որոշումը։ Խոսում ենք տեղական արտադրողի և հիմնական արտադրողի մասին և լռում ենք այն մասին, որ այդ հիմնական արտադրողը 75 տոկոս բաժնեմասով օֆշորային լյուքսենբուրգյան ընկերություն է, և ուզում եմ մեզ տեղեկացնեք՝ ով է վերջնական փայատերը և որքանով է տեղական համարվում, ներկայացրեք ԱԺ և քննարկենք շահերի բախումը և հասկանանք՝ ինչն է համարվում տեղական արտադրող»,- հայտարարեց Թանդիլյանը։

Պատգամավորի կարծիքով՝ իրենք այսպես չեն կարող հակասություններով լի, ոչ որակյալ առաջարկն ընդունել. «Առաջարկը պետք է դիտարկել, ընթացիկ իրավիճակը պահպանել, ուսումնասիրություն անել հասկանալու համար գնագոյացումն ինչ միջոցով է արվում, եթե պատրաստվում ենք աջակցել տեղականին, պետք է հասկանալ այս համատեքստում՝ կարո՞ղ ենք աջակցել տեղական ներկրողին, որից պաշտպանված կլինեն բոլորի շահերը։ Պարտավոր ենք ունենալ մրցակցային տնտեսություն, տեղականը պետք է լինի մրցակցային, սա այլընտրանք չունի և ուստի պետք է արտոնության տեսքով հետաձգել այս որոշումը, որպեսի փակման վտանգի շանտաժի կոնտեքստից էլ դուրս գանք»։

«Պետական տուրքի մասին» և «Գործունեության իրականացման ծանուցման մասին» նախագծերում փոփոխություններ կատարելու փաթեթով կառավարությունն առաջարկում է ներմուծվող ցեմենտի համար պետական տուրք սահմանել, որպեսզի տեղական արտադրողների շուկայական դիրքերը պահպանվեն։ Տեղական շուկան պաշտպանելու նպատակով առաջարկվում են կիրառել ներմուծման տուրք՝ յուրաքանչյուր տոննայի համար՝ 22000 դրամ։