Ձեր վստահելի աղբյուրը

«ՀՀ-ում ցեմենտ արտադրող երեք հիմնական գործարաններ կան՝ «Արարատցեմենտը», Հրազդանի գործարանը և նաև Երևանում ցեմենտ արտադրող մեկ գործարան, որը ցեմենտի հումքը ներմուծում է արտասահմանից։  «Արարատցեմենտը» այսօր առաջարկում է 40 հազար դրամ բացթողման գին, Երևանը ցեմենտի գործարանը՝ 41 հազար դրամ, իսկ Հրազդանի գործարանը՝ 48 հազար դրամ»,- այսօր Ազգային ժողովում «Պետական տուրքի մասին» ՀՀ օրենքում լրացում կատարելու մասին և կից ներկայացված օրենքի նախագծերի փաթեթի քննարկման ժամանակ ասաց հարակից զեկուցող, «Իմ քայլը» խմբակցության պատգամավոր Հայկ Սարգսյանը։

Նրաի խոսքով՝ հեղափոխությունից հետո հայկական շուկա ներմուծվեց նաև իրանական ցեմենտ, որի արժեքը Հայաստանի սահմանի վրա կազմում էր 8-ից 10 հազար դրամ և նույնիսկ հարկվելուց հետո արժեքը 13 հազար դրամից չէր գերազանցում։

«Եթե կառավարությունը քայլ չաներ, տեղական գործարաններ արագ կփակվեին, և ՊԵԿ-ը հսկիչ 100 հազար դրամ է սահմանում, որպեսզի մրցակից լինի տեղական ցեմենտին։ Սրանով հանդերձ 2018 ընդհանուր ցեմենտի 25 տոկոսն է ՀՀ ներմուծվել, մնացած 75 տոկոսը տեղական արտադրողներն են ապահովել։ Իրանական ցեմենտ մուտք գործելուց հետո ցեմենտի գները ՀՀ-ում նվազեցին 10 հազար դրամով, և սա ոչ թե սեփականատերերի բարի կամքի, այլ կառավարության վարած քաղաքականության արդյունքում էր, երբ մրցակցություն առաջացավ, նաև որակը լավացավ»,- նշեց պատգամավորը։

Սարգսյանը հայտնեց, որ հիմա կառավարությունն առաջարկում է 22 հազար պետտուրք կիրառել, քանի այլևս հսկիչ գին չեն կարող սահմանել, ինչը բնական վրդովմունք է առաջացրել ներմուծողների մոտ։

«Այս գինը կհակակշռի և մրցակցություն կլինի, ինչը բխում է ՀՀ մեծամասնության շահերից« «Կարևոր է, որ իրանական ցեմենտը շարունակվի ներմուծվել։ Եթե այս պետտուրքի չափը հաստատվի և 22 հազար տուրք սահմանվի, մեկ տարվա ընթացքում ցեմենտի ներմուծման արդյունքում 4 մլրդի պետական տուրք կունենա պետբյուջեն, այն դեպքում, երբ ցեմենտ արտադրող տեղական գործարանները 3, 3 մլրդ հարկ են վճարել, բայց երեք անգամ էլ շատ են իրացրել»:

Ինչ վերաբերում է «Արարատցեմենտ»-ին՝ Հայկ Սարգսյանն ասաց, որ այն պատկանում է «Մուլտի գրուպ» կոնցեռնին, որի սեփականատերը Գագիկ Ծառուկյանն է:

«Ես շատ եմ հարգում Գագիկ Ծառուկյանին՝ հաշվի առնելով, որ նա զրոյից հաջողությունների հասած գործարար է, և նաև նրա կոնցեռնն ամենաշատ հարկ վճարողներից է։ Այս օրերին պարոն Ծառուկյանը հայտարարել է, որ տնտեսական հանձնաժողովի մի շարք պատգամավորներ հանդիպել են ցեմենտ արտադրողների հետ՝ նկատի ունենալով, որ իրենց դեմ են գործել։ Այո, հանդիպել ենք, տարօրինակ չէր լինի նման հարց քննարկվեր, և բոլոր ցեմենտ արտադրողների հետ չհանդիպենք խնդիրները քննարկենք։ Մենք ցանկացած հարցի քննարկման ժամանակ շահագրգիռ բոլոր կողմերի հետ հանդիպում ենք։ Պետք է շահավետ լուծումը գտնել, որը կբերի քաղաքացիների մեծամասնության շահերի պաշտպանությանը, ոչ թե մեկ արտադրողի շահերից ելնելով որոշում կայացվի և այդկերպ հասնեն օպտիմալ լուծման»,- հավելեց հարակից զեկուցողը։