Ձեր վստահելի աղբյուրը

Երևանի ավագանու՝ ապրիլի 23-ի նիստում կքննարկվի «Երևանի աղբահանություն և սանիտարական մաքրում» համայնքային հիմնարկ ստեղծելու և դրա կանոնադրությունը հաստատելու մասին որոշման նախագիծը:

Այպիսով,  նախատեսվում է Երևանի վարչական տարածքում աղբահանության և սանիտարական մաքրման աշխատանքները իրականացնելու նպատակով ստեղծել նոր հիմնարկ: Այն կստեղծվի Երևան համայնքի բյուջեի միջոցների հաշվին:

«Երևանի աղբահանություն և սանիտարական մաքրում» համայնքային հիմնարկը  կլինի Երևանի քաղաքապետարանի կազմում: 

Հիմնարկի գործունեության հիմնական նպատակը մայրաքաղաքում աղբահանության և սանիտարական մաքրման (ներառյալ՝ ձմեռային ամիսներին) աշխատանքների իրականացման ապահովումն է:

Նման հիմնարկի ստեղծման անհրաժեշտությունն առաջացել է  «Սանիթեք» ընկերության  կողմից ծառայությունների ոչ պատշաճ իրականացման պատճառով:

Հիմնավորման մեջ մասնավորապես նշված է.

«Հաշվի առնելով, որ «Սանիթեք» ՍՊԸ հայաստանյան մասնաճյուղը և «Սանիթեք Ինթերնեյշնլ» ՍՊԸ-ն ձախողում են ստանձնած պարտավորությունների կատարումը, Երևանի քաղաքապետի կողմից սեփական պարտադիր լիազորության իրականացումն ապահովելու, ինչպես նաև բնակչության առողջության և շրջակա միջավայրի վրա աղբի բացասական (վտանգավոր) ներգործության նվազեցման և չեզոքացման, բնակության համար հարմարավետ և էկոլոգիապես անվտանգ պայմանների ապահովման նպատակով առաջարկվում է ընդունել այս որոշման նախագիծը»: