«Սա թատրոն չէ». տնտեսագետները ցանկանում են, որ վարչապետն իրենց առաջ խնդիր դնի
«Կրթական համակարգում արմատական փոփոխություններ են անհրաժեշտ»,- վարչապետ Նիկոլ Փաշինյանի՝ ԵՊՀ տնտեսագիտության և կառավարման ֆակուլտետի ուսանողների ու պրոֆեսորադասախոսական կազմի հետ հանդիպման ժամանակ ասաց տնտեսագիտության դոկտոր, պրոֆեսոր Թաթուլ Մանասերյանը:
Տնտեսագետը դիմելով վարչապետին՝ ասաց, որ ակնկալում էր՝ երկրում տեղի ունեցած փոփոխություններից հետո գիտության ոլորտը հեղափոխական փոփոխությունների կենթարկվի, մինչդեռ այդ ակնկալիքները չարդարացան: Նա նաև գտնում է, որ Գիտությունների ազգային ակադեմիան էլ չի կարող սպասարկել այսօրվա մարտահրավերները, որոնք դրված են տնտեսության կամ երկրի զարգացման առջև:
«Հիմա Դուք ի՞նչ ունեք տալու Հայաստանին, թե մենք եկել ենք միայն ակնկալելու, թե ինչ կարող ենք վերցնել: Եթե այստեղից գնալուց առաջ մի քանի խնդիր առաջադրեք մեզ՝ տնտեսագետներիս, դա շատ կարևոր կլինի, և մենք այսօրվանից սկսած կսկենք մտորել, թե ինչ կարող ենք տալ, այլ ոչ թե ինչ կարող ենք սպասել կառավարությունից, քանի որ սա թատրոն չէ, համերգ չէ, որ նայենք ու ծափահարենք, կամ էլ՝ դժգոհենք»,- ասաց Թաթուլ Մանասերյանը:
Վարչապետը նշեց, որ որպես այսօրվա հանդիպման արդյունք, կձգտեր որոշակի հստակեցումներ մտցվեին կառավարության և տնտեսագիտական հանրության հարաբերություններում։
Նա նախ նշեց, որ վերջին 1 տարվա ընթացքում կառավարությունը տարբեր քննարկումներ է ունեցել և շատ առաջարկներ է ստացել։
Ըստ նրա՝ շատ կարևոր է հասկանալ, թե ինչպես պետք է կառուցվեն այդ հանրության և կառավարության հարաբերությունները:
«Այսօր տնտեսական մոդելը ստացել է ժողովրդի վստահության քվեն, և այժմ տնտեսագիտական հանրությունը պետք է առաջարկներ ներկայացնի, թե ինչպես պետք է այդ մոդելը կյանքի կոչվի: Վերջին 11 ամիսների ընթացքում տարբեր տնտեսագիտական հարթակներում ունեցած քննարկումների իմ եզրակացությունն այն է, որ առանց քաղաքական տեսլականի որևէ տնտեսագիտական քննարկում վերջնական իմաստ չի ստանում»,- ասաց նա:
Նիկոլ Փաշինյանի խոսքով՝ տնտեսական գործընթացները պետք է զարգանան որոշակի քաղաքական տեսլականի շրջանակում: Ըստ նրա՝ այդ տեսլականը մի քանի անգամ ներկայացրել են. «Ապացուցե՞լ է այս տեսլականը իր ճշմարտացիությունը, ո՛չ, չի ապացուցել և աշխարհում չկա մի տեսլական, որ իր ճշմարտացիությունը ապացուցած լինի։ Դրա համար կառավարությունն այդ մոդելի իրագործման համար վերցրել է քաղաքական պատասխանատվություն, ժողովրդից ստացել է մանդատ, և տնտեսագիտական հանրության հետ հարաբերությունները պետք է կառուցվեն այս տրամաբանության մեջ: Այսօր մեր երկրում կառավարման հետ կապված ամենամեծ խնդիրն այն է, որ փորձագիտական հանրություն-կառավարություն համագործակցության խնդիր կա: Կառավարությունն այսօր ցանկացած խնդրի լուծման համար փորձագետներ է հրավիրում արտերկրից՝ դրա համար վարկեր ու գրանտներ վերցնելով»:
Այսպիսով, ըստ վարչապետի, փորձագիտական ինստիտուտը պետք է էականորեն ուժեղանա: Ըստ նրա՝ տեսակետներ կան, թե Հայաստանի փորձագիտական ներուժի մեխանիզմներն այն աստիճանի հղկված չեն, և եթե սկսեն տեղական փորձագիտական հանրության հետ աշխատել, շատ բաներից հետ կմնան: Սակայն նա կարծում է, որ այդ ժամանակն արժե իրականացնել, քանի որ արդյունքում կունենանք ուժեղ փորձագիտական ինստիտուտներ բոլոր ոլորտներում:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
