Ձեր վստահելի աղբյուրը

Այսօր տեղի է ունեցելԲարձրագույն  դատական խորհրդի նիստը, որին մասնակցել է նաև ՀՀ փաստաբանների պալատի նախագահ Արա Զոհրաբյանը։ Այս մասին հայտնում են Բարձրագույն դատական խորհրդի մամուլի և հասարակայնության հետ կապերի ծառայությունից։

Խորհրդի նախագահ Գագիկ Հարությունյանը քննարկման է ներկայացրել Ա․ Զոհրաբյանի՝ Խորհրդին ուղղված գրությունը, որում ներառված էին փաստաբանների որոշ դիտարկումներն ու առաջարկությունները՝ արդարադատական գործընթացների արդյունավետ կազմակերպման առնչությամբ։ 

Բարձրացված խնդիրների վերաբերյալ կայացել է կառուցողական քննարկում, հնչել են առաջարկներ, ընդունվել համապատասխան որոշումներ։

Դատական դեպարտամենտի համապատասխան ստորաբաժանումներին տրվել են հանձնարարականներ՝ քննարկման ընթացքում ներկայացված մի շարք հարցերի ուղղությամբ կատարելու լրացուցիչ ուսումնասիրություններ ու վերլուծություններ և դրանք ներկայացնել Խորհրդին։ Արձանագրվել է նման քննարկումների կազմակերպման կարևորությունը և պայմանավորվածություն ձեռք բերվել դրանք դարձնել պարբերական:

Որպես օրակարգային հարց՝ Բարձրագույն դատական խորհուրդն անդրադարձել է նաև Բարձրագույն դատական խորհրդի, դատավորների, Դատական դեպարտամենտի կենտրոնական մարմնի և առանձնացված ստորաբաժանումների աշխատակիցների միջև պետական բյուջեով նախատեսված պարգևատրումների, դրամական խրախուսանքների և հատուկ վճարների հատկացման խնդրին։

Խորհուրդը գտել է, որ նշված վճարների հաշվարկման հիմքում անհրաժեշտ է դնել «Հայաստանի Հանրապետության 2019 թվականի պետական բյուջեի մասին» օրենքով և ՀՀ կառավարության 2018 թվականի դեկտեմբերի 27-ի թիվ 1515 որոշմամբ   Բարձրագույն դատական խորհրդի  և դատարանների համար առանձին տողով նախատեսված պարգևատրումների, դրամական խրախուսանքների և հատուկ վճարների ֆոնդերի և յուրաքանչյուր աշխատակցի փաստացի աշխատավարձի հարաբերակցությունը։