Ձեր վստահելի աղբյուրը

Այսօր աշխարհում շարունակվում է բավական լուրջ սպառնալիք ներկայացնել միջազգային ահաբեկչությունը: Արաբագետ Արմեն Պետրոսյանը դրանց կանխարգելման ու դատապարտման գործում կարևորում է միջազգային հանրության արձագանքն ու գործողությունները, հակառակ դեպքում Հյուսիսային Աֆրիկայում, Մերձավոր Արևելքում ընթացող գործողությունները կշարունակվեն ու կընդլայնվեն։

«Շրի Լանկայում տեղի ունեցած ահաբեկչությունը բավական լավ կազմակերպված, հստակ  թիրախավորում ունեցող գործողությունն էր՝ ուղղված քրիստոնեական համայնքի դեմ:  Անգամ օրն ընտրված էր խորհրդանշական, երբ քրիստոնեական հանրությունը նշում էր Հիսուս Քրիստոսի սուրբ Հարության տոնը»,-ասաց արաբագետը լրագրողների հետ հանդիպմանը։
Արաբագետի խոսքով, մտահոգիչ ու ահազանգոնղ է հատկապես այն փաստը, որ գնալով ահաբեկչական գործողություններն ունենում են հստակ՝ ազգային, կրոնական, քաղաքակրթական թիրախներ։

Հայաստանցի փորձագետը հիշեցնում է, որ Հնդկաստանի հատուկ ծառայությունները ահաբեկչությունների վտանգի մասին զգուշացրել էին դեռ ապրիլի սկզբին, սակայն Շրի Լնակայի իշխանությունը ձախողել է և չի կարողացել կանխել դրանք։

«Մի բան ակնհայտ է, պատասխանատվություն ստանձնած կազմակերպությունը տեղական ու ոչ հայտնի կազմակերպություն է, մինչ այժմ առանձնացել է բուդդայական համայնքների դեմ գործողություններով։ Շրի Լանկայի իշխանությունները փորձելու են ու հիմա արդեն փորձում են սլաքներն ուղղել դեպի դուրս, դեպի Իսլամական պետություն»,-ասաց բանախոսը։
Նա համարում է, որ նման ծավալի ու լավ կազմակերպած ահաբեկչության պատասխատվությունը չստանձնեց հայտնի կազմակերպություններից և ոչ մեկը, ինչը վկայում է այն մասին, որ այդ գործողությունները նրանք չեն իրականացրել։

Արմեն Պետրոսյանն ընդգծեց՝ միջազգային հանրության արձագանքի կարևորությունը, քանի որ պատմությունը կրկնվելու հատկություն ունի։

«Սրանից մեկ դար առաջ աշխարհամարտի տարիներին տեղի ունեցավ Հայոց Ցեղասպանությունը, միջազգային հանրությունը մատերի արանքով էր նայում այդ իրողություններին, ինչը հանգեցրեց երկրորդ համաշխարհային պատերազմի, հրեաների ցեղասպանության։ Հիմա նույն վիճակն  է մեր օրերում, միջազգային հանրության անտարբերությունը հանգեցնում է այն իրավիճակին, որ աշխարհն առաերսվում է նման նման հազանգող ու վտանգավոր իրողությունների»,-ասաց նա։

Հարցին, արդյո՞ք  Հայաստանին սպառնում են ահաբեկչական գործողություններ, Արմեն Պետրոսյանը կարծիք հայտնեց, որ նման վտանգ չկա մի քանի պատճառով։

«Նման կազմակերպությունները՝ «Իսլամական պետությունը», «Ալ Քաիդան» ունեն հստակ իրենց գործելաոճը։ Նրանց համար առավել հետաքրքրիր են այն երկիրները, որտեղ կա մուսուլմանական բնակչություն կամ համայնք, քանի որ նրանց գաղափարախոսությունը շատ ավելի արդյունավետ է նման երկրներում»,-ասաց Պետրոսյանը՝ ավելացնելով, որ Հայաստանի բոլոր հարևան երկրները թիրախավորված են, քանի որ չորսից երեքը մուսուլման բնակչություն ունեն, իսկ Վրաստանում առկա է մուսուլմանական համայնք։

Բանախոսի գնահատմամբ, պատճառներից մեկն էլ այն է, որ Հայաստանից որևէ մեկը չի գնացել ու մասնակցել Մերձավոր Արևելքում տեղի ունեցած ջիհադին։ Միաժամանակ արաբագետն ընդգծեց, որ հատուկ ծառայությունները պետք է աչալուրջ լինեն ու լլուրջ հսկողություն իրականացնեն, քանի որ սահմանների բաց լինելը դյուրինացրել է տարբեր երկրների, այդ թվում Հարավային Ասիայի երկրների քաղաքացիների, որոնք ունեն տարբեր գաղափարկներ ու նպատակներ, մուտքը մեր երկիր։