Ձեր վստահելի աղբյուրը

«Ներդրումների առումով կան որոշակի հետաքրքրություններ, բայց կառավարությունը դեռևս չի տիրապետում, թե ինչ խոչընդոտներ կան ներդրումների համար»,- այս մասին այսօր լրագրողների հետ հանդիպման ժամանակ ասաց Գործատուների հանրապետական միության նախագահ Գագիկ Մակարյանը:

Նրա խոսքով՝ պետական համապատասխան մարմինների կողմից ակտիվ ցանկություն չի դրսևորվում այդ խնդիրները հաղթահարելու համար:

«Բոլորին թվում է, որ ստեղծված օրենքները լավն են և բավարար ներդրումներ ներգրավելու համար: Վարչապետն անձամբ ուշադրություն է դարձնում ներդրումներին, բայց համապատասխան ինստիտուտները ոչ թե պետք է բավարարվեն վարչապետի կոչերով  կամ նրա կողմից արված հայտարարություններով, այլ պետք է իրենք էլ խնդիրներ լուծեն, որը, սակայն, չի արվում»,- նշեց Գագիկ Մակարյանը:

Ըստ նրա՝ ներդրումների բացակայությունը հանգեցնում է նրան, որ Հայաստանում չկա արժեթղթերի շուկա, և ամբողջ ֆինանսական շուկան գտնվում է բանկերի ձեռքում։

Անդրադառնալով տնտեսական հեղափոխությանը՝ նա ասաց, որ խոսում են որոշ ծրագրերի մասին, որոնք պետք է իրականացվեն, սակայն դրանք հատուկենտ են և չեն կարող տնտեսական հեղափոխության համար հենասյուներ հանդիսանալ:

Գագիկ Մակարյանը նաև նշեց՝ խնդիրներից մեկն էլ այն է, որ համայնքները բավարար ակտիվություն չեն ցուցաբերում տնտեսության ոլորտում. «Կարևոր է նաև համայնքների ակտիվությունը, ինչն առայժմ չկա։ Այսինքն ՝մարզպետները չունեն այն օրակարգը, որով  պետք է առաջնորդվեն: Մարզպետարանները պետք է նախաձեռնողականություն դրսևորեն, որը, սակայն, չենք նկատում»: 

Պատասխանելով հարցին, թե Նիկոլ Փաշինյանը վերջերս  հայտարարեց, որ  Հայաստանում 50 հազար նոր աշխատատեղ է ստեղծվել, արդյոք տեղյակ է, թե որ ոլորտներում են այդ աշխատատեղերը բացվել, Գագիկ Մակարյանը նշեց՝ չի ցանկանում կասկածի տակ դնել վարչապետի  խոսքը, բայց կարծում է, որ 50 հազարը դեռևս ապացուցելու կարիք ունի: