Համալսարաններն այլևս քաղաքական գործիք չպետք է լինեն կառավարության ձեռքին. Փաշինյան
Կառավարության այսօրվա նիստում հաստատվեց ՀՀ բուհերի 2019-2020 ուսումնական տարվա՝ ըստ մասնագիտությունների պետության կողմից ուսանողական նպաստների ձևով ուսման վարձի լրիվ փոխհատուցմամբ (անվճար), ուսման վարձի մասնակի զեղչի կիրառման իրավունքով (վճարովի) առկա ուսուցմամբ բակալավրի, անընդհատ և ինտեգրացված կրթական ծրագրերով ընդունելության տեղերը հաստատելու մասին որոշման նախագիծը:
Կրթության և գիտության նախարար Արայիկ Հարությունյանը նշեց, որ բակալավրի համար հատկացվել է 2600 տեղ, 1300 մագիստրոսական տեղ, 140 ասպիրանտական տեղ: Նախարարը հայտնեց, որ այս տեղերը հաշվարկելիս հիմք է ընդունվել առկա պահանջարկը, բուհերի առանձնահատկությունները, կառավարության ծրագիրը, գերատեսչությունների, այդ թվում՝ մարզպետարանների առաջարկները:
Վարչապետ Նիկոլ Փաշինյանն ասաց, որ բարձր տեխնոլոգիաների, գյուղատնտեսության և զբոսաշրջության զարգացումը կառավարության գերակայությունների թվում է, ուստի պետք է նաև դրանց ուշադրություն դարձնել։ «Մենք ուշադիր պետք է լինենք, որ իներցիոն երևույթները սովորական չդառնան: Երբեմն մենք չենք կարողանում հոդաբաշխ բացատրել, թե ինչու ենք այս կամ այն ոլորտում այդքան անվճար տեղ հատկացնում, ինչ հաշվարկների վրա են դրանք հիմնված։ Մյուս կողմից՝ իներցիան փոխելու համար որոշակի ճանապարհ պետք է անցնենք»,- նշեց նա։
Վարչապետի խոսքով՝ հաջորդ տարի այս որոշումը՝ տեղերի հատկացումը, պետք է կայացվի բոլորովին ուրիշ վերլուծությունների հիման վրա։
«Այո, համալսարաններին նեղացնելու քաղաքականությունից պետք է դուրս գալ: Հույս ունեմ, որ կոպիտ չի հնչի, բայց մեր երկրում համալսարանները մեր հանրությանը բավարար չափով նեղացրել են»,-ասաց Նիկոլ Փաշինյանը՝ հավելելով, որ համալսարաններն այլևս քաղաքական գործիք չպետք է լինեն կառավարության ձեռքին, բուհերը պետք է ապաքաղաքականացվեն:
Վարչապետը նշեց նաև՝ պետք է որոշակի երաշխիքներ ապահովեն, որ բուհն ավարտած ուսանողի աշխատանքը գտնելու շանսերը բարձր լինեն, այսօր միջազգային ասպարեզում ներառված բուհերի համար դա կարևոր չափանիշ է. «Մենք պետք է այս տրամաբանությամբ գնանք»:
Նիկոլ Փաշինյանը նաև ասաց, որ մշակույթի ոլորտում ևս ամբողջ քաղաքականությունը պետք է փոխեն և այլ տրամաբանության վրա դնեն։
«Օրինակ՝ երաժշտության ասպարեզում այսօր ունենք երիտասարդ այնպիսի անուններ, ինչպիսիք են Սերգեյ Խաչատրյանը, Նարեկ Հախնազարյանը և այլն, և մենք պետք է մի պարզ հարցի պատասխանենք` ինչո՞ւ էր անհրաժեշտ, որ այդ մարդիկ Հայաստանից հեռանային, որպեսզի դառնային աշխարհահռչակ երաժիշտներ: Սա շատ պարզ, գործնական խնդիր է, որը մենք պետք է լուծենք: Մենք պետք է ստեղծենք պայմաններ, որպեսզի Հայաստանում մարդիկ ապրելով, աշխատելով, սովորելով՝ աշխարհահռչակ երաժիշտներ դառնալու շանս ունենան»,- ընդգծեց նա։
Նիկոլ Փաշինյանի խոսքով՝ արվեստի բուհերի խնդիրները կառավարության խնդիրներն են. «Իսկ ո՞վ է ասել՝ արվեստի բուհերի խնդիրներն ավելի կարևոր են արվեստի բուհերի համար, քան կառավարության համար։ Դրանք առնվազն նույնքան կարևոր են մեզ համար, մենք առնվազն նույնքան նվիրված ենք և պարտավորված ենք այդ խնդիրները լուծելու»։
Վարչապետը նաև նշեց, որ կրթությունը ռազմավարական ուղղություն է և պետական ներդրումների ծավալները պետք է մեծացնեն, սակայն պետք է առաջնորդվել ավելին՝ ավելիի դիմաց սկզբունքով: «Ընդհանրապես խոսակցությունները չպետք է սկսել փողից, այլ նախ պետք է ճշտել, թե ինչ խնդիրներ ենք լուծում»,- ասաց Նիկոլ Փաշինյանը։
Լրահոս
Տեսանյութեր
Փաշինյանը որոշել է օրհներգի տեղերը փոխել իր ճաշակով, ու արդեն օրենքը խախտել են. Մանուկյան
