Ձեր վստահելի աղբյուրը

Պետական վերահսկողական ծառայության պետի պաշտոնը զբաղեցրած Դավիթ Սանասարյանն ընթացող ասուլիսում խոստացավ ձեռքը կտրել այն խմբագրությունում, որը կհրապարակի իր կողմից կաշառք վերցնելու տեսանյութը։

«Կա ինձ վստահողների մի մեծ բանակ, ովքեր չեն հավատում, որ ես կարող եմ որևէ կապ ունենալ կոռուպցիոն դրսևորումների հետ, ու որոշների տարբեր տեղերը մրմուռ է գալիս դրանից, բայց ոչինչ,  ես սովոր եմ այդ վիճակներին ու  ներողամտությամբ եմ վերաբերվում։ Ես վստահեցնում եմ, որ նման տեսանյութ չկա և չի կարող լինել»,-ասաց նա։

Նա համոզված է, որ քրեական գործն այլ ելք չի կարող ունենալ, քան մեղադրանքի կասեցումը։

«Ես շատ վստահ եմ, որևիցե վայրկյան չեմ կասկածում, որ կարող է լինել այլ ելք, քան մեղադրանքի կասեցումն է։ Եթե այդպես գնաց, ապա բավականին լուրջ նոր պայքար է սկսելու նոր Հայաստանում։ Իրավական դաշտը մաքրելու նոր պայքար է սկսելու նոր Հայաստանում, ես վստահեցնում եմ դա։ Ես չեմ ասում, եթե ինձ մեղադրեք, ձեզ հետ կռիվ եմ տալու, բայց ես ասում եմ, քաղաքացիներն էլ են տեսնում, որ այստեղ խնդիր կա»,-ասաց Սանասարյանը։

Ասուլիսին մասնակից Դավիթ Սանասարյանի փաստաբան Ինեսա Պետրոսյանն էլ հայտարարեց՝ պնդում է, որ նրան առաջադրվել է հանիրավի ու շինծու մեղադրանք։

«Նա որևէ արարք չի կատարել, որի համար կարող է քրեական պատասխանատվության ենթարկվել։ Այս ամենը, կրկնում եմ, որ շինծու մեղադրանք է նրա նկատմամաբ, և դա իրականացվել է ԱԱԾ քննչական դեպարտամենտի կողմից։ Այդ գործողությունները սկսկեցին ապրիլի 9-ից , երբ պարոն Սանասարյանը հրավիրվեց որպես վկա հարցաքննության, սակայն նրան արդեն իսկ լսում էին կասկածյալի իրավունքներով ու պարտականություններով»,-ասաց փաստաբանը։

Ինեսա Պետրոսանի խոսքով, այդ ժամանակ կար հետագա գործողությունների ուրվագծված պլանը։ Որպես հիմնավորում նշում է, որ ապրիլի 12-ին Դավիթ Սանասարյանին ներկայացվում է կասկածանք, մինչ փաստաբանները հարցումներ էին անում, ներկայացնում են միջնորդություն, կից նյութեր, արձանագրություններ, որոնք, ըստ Պետրոսյանի, պետք է հիմք դառնային մեղադրանք չառաջադրելու համար, սակայն քննիչը դրանք մի կողմ է շպրտել։

«Իրենք ունեին արդեն որպես մեղադրյալ ներգրավվելու մասին որոշում՝ թվագրված ապրիլի 17-ով։ Դա թղթապանակի մեջ դրված էր, մեր աչքի առաջ էր։ 17-ին մեզ հրավիրեցին, սակայն քննչական գործողությունները տևեցին մի քանի ժամ, և օրը փոխվեց՝ դարձավ 18։ Դա է պատճառը, որ նրանք օրը փոխեցին, ամսի 18-ին ժամը 00։05 րոպեին պարոն Սանասարյանին ներգրավեցին որպես մեղադրյալ։ Դեռ երկու օր ժամանակ ունեին՝ քննչական գործողություններ իրականացնելու համար, որոնց արդյունքում պարզ կդառնար, որ առաջադրված մեղադրանքն անհիմն է, պետք է զերծ մնային մեղադրանք առաջադրելուց, մինչդեռ շտապեցին ու ապրիլի 17-ին, ըստ էության, իրենց այդ գործը կատարեցին, իսկ հաջորդ օրն արդեն պատրաստ էր Սանասարյանի պաշտոնավարումը դադարեցնելու վերաբերյալ որոշումը»,-ասաց փաստաբանը։

Հիշեցնենք, որ Ապրիլի 18-ին Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով:

Քրեական օրենսգրքի 308 հոդվածի 1-ին մասը սահմանում է. «Պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով, որն էական վնաս է պատճառել անձանց, կազմակերպությունների իրավունքներին ու օրինական շահերին, հասարակության կամ պետության օրինական շահերին (գույքային վնասի դեպքում՝ հանցագործության պահին սահմանված նվազագույն աշխատավարձի հինգհարյուրապատիկի չափը գերազանցող գումարը կամ դրա արժեքը)՝ պատժվում է տուգանքով՝ նվազագույն աշխատավարձի երկուհարյուրապատիկից երեքհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը հինգ տարի ժամկետով, կամ կալանքով՝ երկուսից երեք ամիս ժամկետով, կամ ազատազրկմամբ՝ առավելագույնը չորս տարի ժամկետով»։