Ձեր վստահելի աղբյուրը

ԵԱՏՄ-ի և Վիետնամի միջև արդեն երկու  տարի գործում է ազատ առևտրի գոտու մասին համաձայնագիրը,  և այն ցույց է տվել իր արդյունավետությունը: Այս մասին այսօր Երևանում տեղի ունեցած Եվրասիական միջկառավարական խորհրդի նիստից հետո լրագրողների հետ ճեպազրույցում ասաց Եվրասիական տնտեսական հանձնաժողովի նախագահ Տիգրան Սարգսյանը:

Նրա խոսքով՝  վիետնամական շուկան մեծ է ու դինամիկ, և հայկական արտադրանքի համար այն հետաքրքրություն է ներկայացնում: 

Տիգրան Սարգսյանը նաև հայտնեց, որ Սերբիայի հետ բանակցություններ են ընթանում ազատ առևտրի գոտու ստեղծման շուրջ: Բացի այդ,  ԵԱՏՄ-ն ազատ առևտրի գոտու մասին  համաձայնագրեր է մշակում Սինգապուրի, Հնդկաստանի և Եգիպտոսի հետ, ինչպես նաև Իսրայելի հետ:

Անդրադառնալով ԵԱՏՄ-ի և Իրանի միջև ազատ առևտրի գոտու ձևավորմանն ուղղված ժամանակավոր համաձայնագրի վավերացմանը՝  Տիգրան Սարգսյանը նշեց, որ այստեղ իրավիճակը բարդ է նրանով, որ երբ բանակցությունների էին ընթանում, Իրանի դեմ պատժամիջոցների  նոր փաթեթը դեռևս չկար:

«Իհարկե դա որոշակի փոփոխությունների կբերի տնտեսվարող սուբյեկտների համար, քանի որ դա լրջորեն ազդում է իրանցի գործընկերների հետ առևտրի իրականացման տեխնոլոգիաների, գործարքների, ֆինանսական գործողությունների վրա: Մյուս կողմից՝ այդ պատժամիջոցները լրացուցիչ հնարավորություններ են ստեղծում՝ առաջին հերթին Հայաստանի  համար, քանի որ Հայաստանը կարող է օգտվել իր աշխարհագրական դիրքից և առաջարկել որոշակի գործիքակազմ, որոնք կարող են նպաստել ապրանքաշրջանառության ծավալների մեծացմանը: Հայաստանը  կարող է նաև կամուրջ լինել  Իրանի և ԵԱՏՄ-ի միջև»,- նշեց Տիգրան Սարգսյանը: