Ձեր վստահելի աղբյուրը

«Արարատ-Արմենիայի» գլխավոր մարզիչ Վարդան Մինասյանը հարցազրույց է տվել ակումբի մամուլի ծառայությանը։

Առաջիկա խաղում ոչ-ոքին՝ ձեռնտու հաշիվ լինելու մասին

«Անկեղծ ասած, այս կարծիքը չեմ կիսում, քանի որ ցանկացած խաղում մեր նպատակը հաղթելն է, իսկ ստացվում է, թե ոչ՝ սա արդեն հարցի մեկ այլ կողմն է: Մենք երբեք դուրս չենք գալիս դաշտ այն մտքով, որ ոչ-ոքի խաղի արդյունքը կարող է ավելի ձեռնտու լինել:

Դեռ վեց խաղ կա և շատ բան կարող է փոխվել: Հստակ կարող եմ ասել, որ մենք նույն նպատակասլացությամբ ենք խաղալու ինչպես նախորդ խաղերում»:

Արտասահմանցի մարզիչների՝ Բարձրագույն խմբում աշխատելու մասին

«Կարող եմ ասել միայն մեկ բան, որ ցանկացած ակումբում նման որոշումներ կայացնում է ակումբի ղեկավարը: Նա է ընտրում իր թիմի փիլիոսփայությունը, և ըստ դրա էլ կատարում մարզչի ընտրությունը, քանի որ հենց ինքն է ֆինանսավորում ակումբը: Ուրիշ բան է, որ այդ հարցում ղեկավարին օգնում են ակումբի տեխնիկական և սպորտային տնօրենները, բայց թե որ մարզչին կհրավիրեն թիմ՝ իրենց անձնական որոշումն է: Ինչ վերաբերվում է «Փյունիկ»-ին, մի բան կարող եմ միայն ասել, որ խաղաոճի փոփոխություն եմ նկատում»,- ասել է Մինասյանն ակումբի մամուլի ծառայության հետ զրույցում: