Ձեր վստահելի աղբյուրը

Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը այսօր Գորիս քաղաքում իր ֆեյսբուքյան ուղիղ եթերում անդրադարձավ Աշխատանքի օրվան ու դրա հետ կապված բազմաթիվ շնորհավորանքներին։

«Աշխատանքի և աշխատավորների միջազգային օրը բազմաթիվ շնորհավորանքներ եմ տեսնում, տեքստեր, լոզունգներ, որ ամեն ինչ լավ կլինի, սակայն իրականում շատ խնդիրներ կան:
Մենք նախընտրական խոստում էինք տվել, որ աշխատանքի պետական տեսչություն ստեղծելու առաջարկով հանդես կգանք։ Հայաստանում մասսայաբար խախտվում են աշխատողների իրավունքները՝ ստրկական պայմաններում աշխատեցնում են, չեն հրամանագրում, արտաժամյա աշխատեցնում են, ավելին՝ աշխատեցնում են վատ պայմաններում։ Այսօր որևէ մարմին չկա, որը հսկողություն կիրականացնի ու կպաշտպանի աշխատողների շահերը։

Մեր երկրում աշխատավարձերն այնքան էլ բարձր չեն՝ մարդիկ կան 60-80 հազար դրամ են ստանում, բայց նրանց իրավունքների խախտման դեպքում առաջինը հորդորում են դիմել դատարան:

Ինչ լինում է, ասում են՝ դիմի դատարան, բայց աշխատողն ինչպե՞ս դիմի դատարան, եթե 60 հազար դրամ է ստանում։ Մենք առաջարկել էինք, որ կառավարությունը վերստեղծի նախկինում փակված Աշխատանքի պետական տեսչությունը, որը կիրականացնի պետության պոզիտիվ պարտականությունը՝ պաշտպանելով աշխատողների իրավունքները։

Հիմա պետությունը չի իրականացնում իր պոզիտիվ պարտականությունը։ Կառավարությունը մերժել է այդ առաջարկը»,- ասաց պատգամավորը։