Ձեր վստահելի աղբյուրը

Փարիզի բնակիչներին, որոնք ապրում են վերջերս այրված Աստվածամոր տաճարից ոչ հեռու, զգուշացրել են կապարով աղտոտվածության մասին։ Այդ մետաղը կա տաճարի կրող կառուցվածքներում և աշտարակում։ Լենտա.ռու-ի հաղորդմամբ, կապարի առկայությունը նկատել են որոշ սենյակներում, որոնք բաց են եղել հրդեհի ժամանակ, կապարի փոշին նստել է այնտեղ։

Հատվածները, որտեղ արձանագրվել են կապարի հետքեր, փակել են։ Տեղի բնակիչներին խորհուրդ է տրվել տանը խոնավ մաքրություն անել։ Առայժմ կապարից թունավորման դեպք չի արձանագրվել։

Կապարը, որպես կանոն, մարդու օրգանիզմ է թափանցում կապար պարունակող փոշի և գոլորշիներ շնչելու միջոցով։ Դա բերում է քրոնիկ ինտոքսիկացիայի։ Սկզբում ախտանշաններն էական չեն, սակայն ժամանակի հետ կարող են զարգանալ սուր էնցեֆալոպատիա և ներքին օրգանների անդառնալի փոփոխություններ։

Տաճարում հրդեհը բռնկվել էր ապրիլի 15-ին, ինչի հետևանքով փլվել է տաճարի որոշ հատվածներ։

Փարիզի Աստվածամոր տաճարը սկսել են կառուցել 1163 թ. Սուրբ Ստեփանոսի բազիլիկ եկեղեցու տեղում, որն իր հերթին հիմնվել էր հեթանոսական Յուպիտերին նվիրված տաճարի վրա։ Կառուցումը տևել է մոտ 200 տարի։ 1991 թվականին տաճարն ընդգրկվել է ՅՈՒՆԵՍԿՕ-ի համաշխարհային ժառանգության ցանկում։