Ձեր վստահելի աղբյուրը

ԵԿՄ նախկին նախագահ, ԱԺ նախկին պատգամավոր Մանվել Գրիգորյանի գործով մեղադրողը կարծում է, որ եթե  նա բուժման պատրավակով հեռանա Հայաստանից, հետագայում նաև  կարող է խուսափել հնարավոր քրեական պատասխանատվությունից:

«Պաշտպանական կողմն ասում է, որ Մանվել Գրիգորյանը պետք է բուժումը ստանա Ֆրանսիայում, դա խոսում է այն բանի մասին, որ ժամանակի ընթացքում այդ հանգամանքն անընդհատ արծարծելով՝  բուժման պատրավակով կարող է հեռանալ Հայաստանից, հետագայում նաև  խուսափել հնարավոր քրեական պատասխանատվությունից»,- Երևան քաղաքի ընդհանուր իրավասության դատարանում Մանվել Գրիգորյանի նկատմամբ խափանման միջոց ընտրված կալանքի հիմնավոր լինելու կամ չլինելու հարցի քննության ասաց մեղադրող դատախազ Վահե Դոլմազյանը։

Նրա խոսքով, պաշտպանական կողմն անընդհատ պնդում է, որ Մ. Գրիգորյանը ծայրահեղ ծանր վիճակում է, կյանքին վտանգ է սպառնում, սակայն երբ առաջին ատյանի դատարանը խափանման միջոց  կալանքը փոխարինեց գրավով, մեղադրյալ Մանվել Գրիգորյանը շատ առողջ մարդու նման դուրս եկավ քրեակատարողական հիմնարկից և նստեց ավտոմեքենան։

Նա նշեց, որ Մանվել Գրիգորյանը տառապում է մի շարք հիվանդություններով, սակայն դրանք այնպիսին չեն, որոնք արգելեն  պահել նրան արգելանքի տակ քրեակատարողական հիմնարկում, փորձաքննության եզրակացությամբ այն ուռուցքային հիվանդությունը, որի մասին բարձրաձայնում է պաշտպանական կողմը,  համարվում է ապաքինված, բուժման կուրս անցնելն անհրաժեշտ չէ:

«Գտնում եմ, որ խափանման միջոցն ընտրված է ճիշտ, և այդ խափանման միջոցի պայմաններում է  հնարավոր բազմակողմանի, օբյեկտիվ քննություն իրականացել դատարանում, խափանման միջոցը  ենթակա չէ փոփոխման, գրավը որպես  կալանավորման այլընտրանքային միջոց  չի կարող պատշաճ երաշխիք հանդիսանալ Մանվել Գրիգորյանի պատճաշ վարքագիծ ապահովելու համար»,- հայտարարեց դատարանը:

Դատախազը հայտարարեց, որ ՔԿՀ-ի պետի կողմից  վարույթն իրականացնող քննիչ Թադևոսյանին հասցեագրված գրության համաձայն, Մանվել Գրիգորյանը հրաժարվում է սնվել շաքարային դիաբեդով հիվանդների համար նախատեսված  համապատասխան սննդակարգով, բացի այդ  որպես հանձնուք բերվել և ընդունվել է հիշյալ հիվանդությանը հակացուցված սննդամթերք։

Նա նշեց, որ պաշտպանական կողմը մշտապես բարձրաձայնում է շաքարային դիաբետի հարցը,  իսկ ներկայացված փաստաթղթով մեղադրողը կասկած է հայտնում, որ հնարավոր է սննդակարգի միջոցով միջամտել և այդ ցուցիչը  փոփոխել համապատասխան  սննդամթերք ընդունելով։

14։50 Նշենք, որ նիստը նախագահող Մնացական Մարտիրոսյանը խորհրդակցական սենյակից վերադառնալուց հետո հայտարարեց, որ անփոփոխ է մնում Մանվել Գրիգորյանի նկատմամբ ընտրված խափանման միջոց կալանավորումը՝ հիմնավոր լինելով պատճառով։ Դատարանը մերժեց նաև պաշտպանի միջնորդությունը Գրիգորյանին գրավի դիմաց ազատ արձակելու վերաբերյալ՝ անհիմն լինելու պատճառով։ 

Մեղադրական եզրակացության համաձայն, Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր,ինչպես նաև կատարել է տարբեր տեսակի հափշտակություններ։

Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանների  մի քանի անգամ դիմել են խափանման միջոց կալանքը գրավով փոխելու միջնորդությունները, սակայն մերժվել են։