Ձեր վստահելի աղբյուրը

Երևան քաղաքի ընդհանուր իրավասության դատարանի Շենգավիթ նստավայրում՝ դատավոր Աննա Դանիբեկյանի նախագահությամբ, տեղի է ունենում ՀՀ երկրորդ նախագահ Ռոբերտ Քոչարյանի գույքի վրա դրված կալանքի գործով դատական նիստը:

Դատարանում մեղադրող կողմն անհիմն որակեց փաստաբանի բողոքը, դատարանին խնդրեց այն մերժել։ Հիշեցրեց, որ Ռոբերտ Քոչարյանին մեղադրանք է առաջադրվել նաև կաշառքի հատկանիշներով։ Նա ասաց, առաջադրված մեղադրանքի պայմաններում՝ առանձնապես խոշոր չափերի՝ 927 մլն դրամ կաշառք ստանալու պայմաններում, որն առկա է նաև մեղադրական եզրակացության մեջ, արգելանքն իրավաչափ է։

«Արգելադրված գույքը համարժեք է և իրավաչափ նպատակ է հետապնդում գույքի հնարավոր բռնագրավումը և բռնագանձումն ապահովելու տեսանկյունից»,-ասաց մեղադրողներից դատախազ Պետրոս Պետրոսյանը։

Քոչարյանի փաստաբան Հովհաննես Խուդոյանը հիշեցրեց, որ բողոքը դատարան ներկայացվել է 2018-ի հոկտեմբերի 1-ին, այն վերաբերում է քննիչի՝ 2018-ի հունիսի 30-ին կայացրած որոշմանը, երբ ՀՀ երկրորդ նախագահին առաջադրված էր մեղադրանք միայն մեկ մեղադրանք՝ Սահմանադրական կարգի տապալման հատկանիշներով։

Փաստաբանը վկայակոչեց  Քրեական օրենսգրքի 55-րդ հոդվածը։ Այն սահմանում է, որ գույքի բռնագրավման չափը դատարանը որոշում է` նկատի ունենալով հանցագործությամբ հասցված գույքային վնասի, ինչպես նաև հանցավոր ճանապարհով ձեռք բերված գույքի չափը: Գույքի բռնագրավման չափը չի կարող գերազանցել հանցագործությամբ հասցված վնասի կամ հանցավոր ճանապարհով ձեռք բերված օգուտի չափը:

«Եթե մեղադրողը կարծում է, որ Ռոբերտ Քոչարյանը կաշառք է ստացել 3 մլն դոլարի չափով, ապա նա կարող է բռնագրավման համար արգելանք դնել 3 մլն դոլարի գույքի վրա»,-ասաց փաստաբանը։

Խուդոյանն ընդգծեց, արգելադրված գույքը նույնիսկ չի գնահատվել, որպեսզի հասկանան, թե այն ինչ արժեք ունի, արդյո՞ք այդ արժեքը բավարար է գույքի բռնագրավման համար։

«Այս պարագայում քննիչի որոշումն ու ԴԱՀԿ-ի գործողությունները, իսկ ավելի կոնկրետ  անգործությունը վկայում  է Ռոբերտ Քոչարյանի իրավունքների խախտման մասին»,-դատարանում ասաց փաստաբանը։

Նա ընդգծեց, արգելանք կարող է դրվել հանցավոր ճանապարհով ձեռք բերված գույքի վրա, մինչդեռ որևէ մեկը չի կարող պնդել, որ Քոչարյանն իր սեփական առանձնատունը ձեռք է բերել անօրինական ճանապարհով, քանի որ այն ՀՀ երկրորդ նախագահին հանձնվել է Հայաստանի Հանրապետության կողմից։

«Նույն կերպ կասկածի տակ չի կարող դրվել Ռոբերտ Քոչարյանի բանկային հաշիվներում առկա գումարների օրինականությունը»,-ասաց փաստաբանն ու նշեց, որ գումարների փոխանցման համար հիմք հանդիսացող աշխատանքային պայմանագիր կա։

Խուդոյանն ասաց, բռնագանձման վերաբերյալ հիմնավորումներն էլ տեղին չեն, հակառակ դեպքում վարույթ իրականացնող մարմինը պետք է արգելանքի տակ պահեր, իրենց պնդմամբ ու արդեն գործով ձեռք բերված ապացույցների հիման վրա հանցավոր ճանապարհով ձեռք բերված ու դրանց ածանցյալ գույքը, իսկ մյուսի վրա արգելանք դնելու իրավունք չուներ։

Փաստաբանն ասաց, որ արգելանքի տակ են նաև այնպիսի փաստաթղթեր ու գույք, որոնք ոչ մի կերպ կապ չունեն քննվող գործի հետ, օրինակ Ռոբերտ Քոչարյանի նույնականացման քարտը, 2017-ին թողարկված բանկային քարտերը, նույն տարում կնքված աշխատանքային պայմանագիրը։

«Անտրամաբանական ու ապօրինի են այն գործողությունները, երբ դատարանը տալիս է խուզարկության թույլտվության, բայց քննիչն իրեն իրավունք է վերապահում վերցնել այնպիսի առարկաներ, որոնք այդ գործին չեն առնչվում»,-ասաց Ռոբերտ Քոչարյանի պաշտպանը։

Խուդոյանը նկատեց, նաև առանց արձանագրության, առանց պարզելու, թե գույքն ումն է պատկանում,  վերցրել են նաև դրամական միջոցներ, որոնք պատկանում են ոչ թե Ռոբերտ Քոչարյանին, այլ նրա որդուն՝ Լևոն Քոչարյանին։

«Եվս մեկ անգամ պնդում եմ, որ այդ գույքը վերցրել են Քրեական դաավարության օրենսդրությամբ չնախատեսված կարգով»,-պնդեց փաստաբանը։

Այսօրվա դատական նիստում կողմերը լրացուցիչ փաստաթղթեր ներկայացրեցին դատարան և այդ փաստաթղթերին ծանոթանալու նպատակով դատական նիստը հետաձգվել է:

Դատավոր Աննա Դանիբեկյանը հայտարարեց, որ դատական նիստը հետաձգվում է։ Հաջորդ նիստը տեղի կունենա հունիսի 6-ին, ժամը 16-ին։