Ձեր վստահելի աղբյուրը

Անցած գիշերվա ընթացքում ադրբեջանական զինուժը միայն Մատաղիսի հատվածում գտնվող մարտական դիրքերի ուղղությամբ խոշոր տրամաչափի դիպուկահար զինատեսակներից, գնդացիրներից ու ինքնաձիգերից արձակել է շուրջ 330 կրակոց: 

Մի քանի օր առաջ էլ Տավուշի մարզի հայկական դիրքերի ուղղությամբ՝ ադրբեջանական զինուժի արձակած կրակոցների հետևանքով պայմանագրային զինծառայող էր վիրավորվել:

Սա այն դեպքում, երբ մարտի 29-ին Վիեննայում տեղի ունեցած հանդիպման ընթացքում Ադրբեջանի ու Հայաստանի ղեկավարները կարևորել էին խաղաղության համար նպաստավոր միջավայրի ստեղծման կարևորությունը և բանակցային գործընթացում հետագա կոնկրետ և շոշափելի քայլերի ձեռնարկումը ` հակամարտությանը խաղաղ լուծում գտնելու համար, ինչպես նաև պարտավորվել էին ամրապնդել հրադադարի ռեժիմը։

Ինչպես երևաց,  հրադադարի ռեժիմը ոչ թե ամրապնդվեց, այլ ավելի հաճախ խախտվեց։

Ադրբեջանագետ Անժելա Էլիբեգովան Panorama.am-ի  հետ զրույցում ընդգծեց՝ Ադրբեջանըն առաջին անգամ չէ, որ  չի հարգում ու չի կատարում ձեռք բերված պայմանավորվածությունները։

«Ամիսներ շարունակ փորձագետները խոսում են այն մասին, որ չի կարելի ցանկացած, ոտքի վրա ձեռք բերված պայմանավորվածություն կամ նույնիսկ բանակցային սեղանի շուրջ ձեռք բերված պայմանավորվածություն ընկալել որպես աքսիոմ»,-ասաց փորձագետը։

Նա հիշեցնում է,  Ադրբեջանը Հայաստանին ընկալում է որպես թշնամի, որպես վտանգ, որին ոչնչացնելու կարիք ունի։

«Թե ռազմական դաշտում, թե բանակցային սեղանի շուրջ  Ադրբեջանն աշխատում է հասնել իր ուզածին։ Վերջին շրջանում ադրբեջանցի պաշտոնյաները բազմիցս հայտարարել են, եթե բանակցային սեղանի շ ուրջ հաջողության չհասնեն, ապա իրենք ունեն ալտերնատիվ տարբերակ՝ պատերազմը։  Այս սրացումը, թե Տավուշում, թե Արցախում, միգուցե հոգեբանական ճնշման նպատակ են հետապնդում, հստակ ասել չեմ կարող։ Ամեն դեպքում դա մեզ համար պետք է լինի ահազանգ, որ ինժիներական աշխատանքներ կատարող, Թուրքիայի հետ համատեղ զորավարժություն անցկացնող, զենք ու զինամթերք ինտենսիվորեն գնող հակառակորդը հստակ պատկերացում ունի՝ ԼՂ հարցն իրեն ի օգուտ լուծելու մասին»,-ասում է Ա. Էլիբեգովան։

Նա նշում է, որ այս փուլում Հայաստանում գերադասում են դրա մասին չխոսել, հավատալ, որ խաղաղասիրական ծրագրերի շրջանում կստացվի երկխոսություն ծավալել։

«Սակայն Ադրբեջանում մեկ անգամ չէ, որ արձագանքել են խաղաղության մասին հայկական կողմի հայտարարություններին։ Նրանք պաշտոնապես հայտարարել են, խաղաղության մասին պատրաստ են խոսել միայն մի դեպքում, երբ հայկական կողմը Արցախից զորքերը դուրս բերի։ Այսինքն, ի սկզբանե մեր ընկալումները խաղաղասիրական երկխոսության մասին ծայրահեղ տարբեր են ու անհամատեղելի»,-ընդգծեց ադրբեջանագետը։

Էլիբեգովան հիշեցնում է, որևէ մեկը պատերազմ չի ուզում, սակայն Հայաստանում կան տարատեսակ խմբեր, որոնք այսպես կոչված, փափուկ բարձ են դնում հասարակության գլխի տակ՝ քարոզելով հանդուրժողականություն ու սեր առ ադրբեջանցիները։

«Բայց դա միակողմանի է, ու այս դեպքում նպաստում է զգոնության թուլացմանը, և ոչ թե դեպի խաղաղություն քայլ առաջ անելուն։ Ես  չգիտեմ, թե ինչ շահեր են հետապնդում այդ խմբերը, միգուցե նրանք դա անում են միամտորեն, բայց ամեն դեպքում պետք է հասկանալ դրա աղետալի հետևանքները։ Երբ դու հասարակությանը համոզում ես, որ պատերազմ չի լինելու, հեսա հաշտվելու ենք նրանց հետ, ու մեկ էլ ադրբեջանցիները սկսում են կրակել մեր առաջանագծում, մարդկանց տների, տեխնիկայի, ճանապարհի ու մեքենաների վրա»,-ասաց նա։

Արցախի ՊԲ-ի հայտարարությունից հետո, ըստ փորձագետի հնարավոր է երկու տարբերակ, կամ պաշտոնական մակարդակով կրկին պայմանավորվածություն է ձեռք բերվում պահպանել հրադադարի ռեժիմը, կամ էլ ադրբեջանական կողմը շարունակում է սադրանքներով մեծացնել լարվածությունը։

«Եթե հիմա դա հիմա չկանխվի, ադրբեջանական կողմը չհասկանա, որ դրա համար ինքը պատժվում է, սադրանքները շարունակելու են հետագայում»,-ասաց նա։

Հիշեցնենք, որ Արցախի Հանրապետության պաշտպանության նախարարությունը ԵԱՀԿ Մինսկի խմբի համանախագահող երկրների ուշադրությունն է հրավիրել իր կողմից հրապարակված  փաստի վերաբերյալ՝ միաժամանակ կոչ անելով ադրբեջանական կողմին ձեռնպահ մնալ իրադրությունը արհեստականորեն սրելու անհեռանկար մարտավարությունից։

Երեկ երեկոյան էլ Հայաստանի պաշտպանության նախարար Դավիթ Տոնոյանը  ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին իր մտահոգություններն է հայտնել վերջին շրջանում հրադադարի ռեժիմի խախտման դեպքերի առնչությամբ, որի արդյունքում վիրավորվել է հայ զինծառայող: