Ձեր վստահելի աղբյուրը

Այսօր՝ մայիսի 3-ին, նշվում է Մամուլի ազատության միջազգային օրը։ Այս կապակցությամբ ուղերձներ են հղել միջազգային կառույցների ներկայացուցիչները։

ՄԱԿ-ի գլխավոր քարտուղար Անտոնիո Գուտերեշն իր խոսքում նշում է, որ ազատ մամուլը կարևոր է խաղաղության, արդարության, կայուն զարգացման ու մարդու իրավունքների համար։

«Ոչ մի ժողովրդավարություն ամբողջական չէ՝ առանց թափանցիկ ու վստահելի տեղեկատվության հասանելիության։Այն անկյունաքարային է՝ արդար, անկողմնակալ ինստիտուտների կառուցման, ղեկավարներին հաշվետու պահելու ու իշխանությանը ճշմարտությունն ասելու համար։ Սա հատկապես ճշմարիտ է ընտրական շրջաններում, որն այս տարվա Մամուլի ազատության օրվա ուշադրության կենտրոնում է։ Փաստերը, այլ ոչ թե կեղծիքը պետք է ուղղորդեն մարդկանց, երբ նրանք ընտրում են իրենց ներկայացուցիչներին։ Մինչդեռ տեխնոլոգիաները վերափոխել են ուղիները, որով մենք ստանում ու կիսում ենք տեղեկատվությունը, որը երբեմն օգտագործվում է հանրային կարծիքը մոլորեցնելու կամ բռնություն ու ատելություն բորբոքելու համար: Քաղաքացիական տարածքն աշխարհում ահագնացող տեմպերով կրճատվում է։Հակալրատվական հռետորաբանության վերելքով աճ է ապրում նաև լրագրողների, ներառյալ կանանց, նկատմամբ բռնություններն ու ոտնձգությունները։ Ես խորապես անհանգստացած եմ հարձակումների աճով ու անպատժելիության մշակույթով»,-ասում է Անտոնիո Գուտերեշը։

Ըստ ՅՈՒՆԵՍԿO-ի տվյալների, 2018թ․-ին սպանվել է գրեթե 100 լրագրող, հարյուրավորները բանտարկվել են։

«Երբ լրատվամիջոցների աշխատակիցները թիրախավորվում են, ամբողջ հասարակությունն է գինը վճարում։ Մամուլի ազատության միջազգային օրը ես կոչ եմ անում՝ պաշտպանել լրագրողների իրավունքները, որոնց ջանքերն օգնում են մեզ կառուցել ավելի լավ աշխարհ բոլորի համար»,-ասում է Գուտերեշը։

Եվրոպայի խորհրդի գլխավոր քարտուղար Թորբյորն Յագլանդն օրվա իր ուղերձում նշում է, որ առանց արտահայտման ազատության չկա ժողովրդավարություն, ազատ ու անկախ մեդիան ժամանակակից ժողովրդավարական հասարակություններում հակակշիռների մաս է կազմում։

ԵԽ-ն հատկապես մտահոգվում է, երբ լրագրողներին թույլ չի տրվում կատարել իրենց աշխատանքը, երբ նրանք ֆիզիկապես հարձակման են ենթարկվում։ Յագլանդը նշում է, որ լրագրողների աշխատանքային պայմանները բարելավման կարիք ունեն։

Եվրոպայի խորհրդի Մարդու իրավունքների հանձնակատար Դունյա Միյատովիչը նշում է, որ Եվրոպայում լրագրողների ազատությունն ու անվտանգությունը վտանգավոր կետի է հասել: Լրագրող Լիրա ՄակՔիի սպանությունը և եվրոպական մի քանի երկրներում ցույցեր լուսաբանող լրագրողների նկատմամբ բռնություններն ու ահաբեկումները վերջին օրինակներն են, որ ցույց են տալիս, որ Եվրոպայում մամուլի ազատության վիճակը վատթարանում է:

Միյատովիչը նշում է, որ վերջին տասնամյակների ընթացքում Մամուլի ազատության համաշխարհային օրը հնարավորություն է ընձեռել խորհելու մամուլի ազատության վիճակի մասին ու խթանելու ազատ, բազմազան ու անվտանգ լրագրությունը:

«Ներկայիս անհանգստացնող միտումների վերցումն ավելի շատ քաղաքական կամքի հարց է, քան միջոցների»,-ասում է Միյատովիչը։