Ձեր վստահելի աղբյուրը

Երևանի ընդհանուր իրավասության դատարանի դատավոր Վարդան Լևոնի Գրիգորյանը, ում մակագրված էր Ռոբերտ Քոչարյանի, Արմեն Գևորգյանի, Յուրի Խաչատուրովի, Սեյրան Օհանյանի քրեական գործը, այսօր առավոտյան ինքնաբացարկ է հայտնել։ Լուրը հաստատեցին նաև Դատական դեպարտամենտից՝ չմանրամասնելով ինքնաբացարկի հիմքերը։

Ըստ տեղեկությունների,  դատավորը «Մարտի 1-ի» գործով երկու մեղադրյալների շահեր է պաշտպանել դատարանում։

ՀՀ երկրորդ նախագահ Ռոբերտ Քոչարյանի փաստաբաններից Հայկ Ալումյանը Panorama.am-ի հետ զրույցում ասաց, չի հավատա տարածված լուրերին, քանի դեռ իրենք չեն ստացել ինքնաբացարկի վերաբերյալ որոշումը։

«Ես վստահ չեմ, որ դատավորն ինքնաբացարկ է հայտնել, ես շատ տարօրինակ կհամարեմ, եթե նման բան լինի։ Ես դրան կհավատամ, երբ որոշումը ստանամ, որովհետև դատավոր Վարդան Գրիգորյանին  գիտեմ որպես բանիմաց ու բարեխիղճ դատավոր»,-ասաց փաստաբանը։

Ալումյանը վստահ է, որ դատավորը գիտի Քրեական դատավարության 300 հոդվածի պահանջը, որ եթե դատավորն այս փուլում ինքնաբացարկ է  հայտնում, այդ որոշման հետ միաժամանակ, նա նաև պետք է քննարկի ու լուծում տա խափանման միջոցի հարցին։

«Իսկ խափանման միջոցի հարցին ինքն իրավունք չունի լուծում տալ՝ առանց մեր մասնակցության դատական նիստ հրավիրելու։ Այսինքն, դա կլինի բոլոր հնարավոր խախտումներից ամենախոշորը, եթե նա ինքնաբացարկ հայտնի առանց անդրադառնալու խափանման միջոցի հարցին, կամ անդրադառնա այդ հարցին, առանց մեր մասնակցության։ Մանավանդ, այսօր՝ առավոտյան շուտ, մինչև տարածված այս լուրերը ես դիմում եմ մուտքագրել, թեև կարող էի չանել, ու հիշեցրել եմ օրենքի այդ պահանջները, գրել եմ, եթե որևիցե որոշում կայացնեք, ներառյալ ինքնաբացարկի որոշումը, ապա պետք է անդրադառնաք խափանման միջոցի հարցին մեր մասնակցությամբ։ Հիմա եթե դատավորը դա չի արել, ես արդեն չեմ պատկերացնում, թե ինչ է կատարվում մեր դատական համակարգում կոնկրետ այս գործի շուրջ։ Մեղմ գնահատականներ չեմ գտնում, իսկ կոշտ գնահատականներ էլ չեմ ուզում տալ»,-ասաց Ռոբերտ Քոչարյանի պաշտպանը։

Ալումյանը չբացառեց, որ Վարդան Գրիգորյանը կարող է ունենալ հիմքեր ինքնաբացարկի համար, քանի որ «Մարտի 1-ի» գործով երկու մեղադրյալ է պաշտպանել, բայց խնդիրն այստեղ «օրենքը գլխիվայր շուռ տալն է»։

Նա կրկին վկայակոչում է Քրեական դատավարության օրենսգրքի 300 հոդվածը, որը սահմանում է, որ որոշումներ կայացնելու հետ միաժամանակ, բացի գործն ըստ ընդդատության ուղարկելու մասին որոշումից, դատարանը պարտավոր է քննել մեղադրյալի նկատմամբ խափանման միջոցներ ընտրելու կամ չընտրելու և դրա տեսակի հիմնավոր լինելու կամ չլինելու հարցը` խափանման միջոցն ընտրված լինելու դեպքում, ինչպես նաև ՍԴ վերջերս կայացրած որոշումը, ըստ որի խափանման միջոցի  հարցին անդրադառնալիք պետք է պաշտպանական կողմին մասնակից դարձնել։

Հարցին, եթե դատավորի ինքնաբացարկի վերաբերյալ որոշումը փաստաբանները ստանան ու համոզվեն դրանում, ի՞նչ քայլեր են պատրաստվում անել, պաշտպանն արձագանքեց. «Ես չեմ սիրում նախապես քայլերի մասին խոսել, կանենք, տեղյակ կպահենք, բայց որ պատասխանը լինելու է համաչափ ու մի բան էլ ավելի, դրանում չկասկածեք»։

Հիշեցնենք, որ գործը դատավորին մակագրվել է ապրիլի 29-ին, ապրիլի 30-ին վարույթ է ընդունվել։

Դատալեքսում հրապարակված մեղադրական եզրակացության համառոտ բովանդակության համաձայն,  Ռոբերտ Քոչարյանին մեղադրանք է առաջադրվել այն բանի համար, որ նա 1998թ․ ապրիլի 9-ից մինչև 2008 թվականի ապրիլի 9-ը զբաղեցնելով ՀՀ Նախագահի պաշտոնը, ՀՀ Սահմանադրության ուժով հանդիսանալով պետության գլուխը և կրելով ՀՀ Սահմանադրությանը հետևելու, օրենսդիր, գործադիր և դատական իշխանությունների բնականոն գործունեությունն ապահովելու պարտականություններ, ինչպես նաև օժտված լինելով մշտապես կազմակերպչական-տնօրինչական և վարչատնտեսական, գործառույթներ իականացնող պաշտոնատար անձի լիազորություններով, այլ անձանց հետ հանցակցությամբ, տապալել է ՀՀ սահմանադրական կարգը, ինչպես նաև իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։

Սեյրան Օհանյանին մեղադրանք է առաջադրվել այն բանի համար, որ նա 2008 թվականին հանդիսանալով Հայաստանի Հանրապետության պաշտպանության նախարարության Զինված ուժերի գլխավոր շտաբի պետը, այլ անձանց հետ հանցակցությամբ, տապալել է ՀՀ սահմանադրական կարգը։

Յուրի Խաչատուրովին մեղադրանք է առաջադրվել այն բանի համար, որ նա 2008 թվականին հանդիսանալով Հայաստանի Հանրապետության պաշտպանույան նախարարի տեղակալը-Երևանի կայազորի պետը, այլ անձանց հետ հանցակցությամբ, տապալել է սահմանադրական կարգը։

Արմեն Գևորգյանին մեղադրանք է առաջադրվել այն բանի համար, որ նա, 2006 թվականի փետրվարից մինչև 2008 թվականի ապրիլի 21-ը զբաղեցնելով ՀՀ Նախագահի աշխատակազմի ղեկավարի և Ազգային անվտանգության խորհրդի քարտուղարի պաշտոնները, օգտագործելով իր պաշտոնեական դիրքը, խոչընդոտներ վերացնելու և ցուցումներ տալու եղանակով օժանդակել է ՀՀ Նախագահ Ռոբերտ Քոչարյանին՝ տապալելու ՀՀ սահմանադրական կարգը։ Բացի այդ, Արմեն Գևորգյանը, հանդիսանալով պետական մարմնում մշտապես կազմակերպչական-տնօրինչական գործառույթներ իրականացնող պաշտոնատար անձ, «Թի Էս Էս Սի Արմենիա» ՍՊ ընկերության միակ մասնակից ու տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վճարելու գործարքին չխոչընդոտելու համար, 2008թ․ ապրիլին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք, ինչպես նաև նույն ժամանակ թաքցնելով ու խեղաթյուրելով նշված գումարի իրական բնույթն ու ծագումը՝ օրինականացրել է առանձնապես խոշոր չափերով հանցավոր ճանապարհով ստացված եկամուտները։