Ձեր վստահելի աղբյուրը

Երևանի ավագանու «Լույս» խմբակցության անդամ Դավիթ Խաժակյանը Երևանի քաղաքապետի, նրա տեղակալների, վարչական շրջանների ղեկավարների ու նրանց տեղակալների աշխատավարձերի բարձրացումը համարում է քաղաքի բյուջեի մսխում։

Նա ուսումնասիրել է աշխատավարձերի բարձրացման  մասին նախագիծը, որն ընդգրկված է մայիսի 8-ին կայանալիք ավագանու նիստում։

«Քաղաքապետարանի միջին և ստորին օղակների աշխատողների, որոնցից մասնագիտական կարողություններ, ունակություններ կամ համայնքային ստաժ են պահանջում, աշխատավարձերը բարձրացել են 25-30 տոկոսով, բայց քաղաքապետի, տեղակալների, թաղապետերի, թաղապետների տեղակալների, թաղապետարանների աշխատակազմերի քարտուղարների աշխատավարձը բարձրանում է 100 տոկոսով, կրկնապատկվում է։ Դրանով մեծ բևեռացում է  տեղի ունենում աշխատակազմերի միջև, ինչն անթույլատրելի է»,-ասաց ավագանու անդամը։

Խաժակյանն ընդգծում է, որ աշխատավարձերի բարձրացումը պետք է, սակայն դրան պետք է նախորդեր հաստիքացուցակների օպտիմալացում։

«Բայց հիմա քաղաքապետարանը որոշել է նոր պաշտոն ստանձնածների, հայեցողական պաշտոն զբաղեցրածների աշխատավարձը կրկնապատկել։ Ես բացել եմ հաստիքացուցակն ու ուզում եմ հասկանալ, քաղաքապետին 7 խորհրդական ինչի՞ է պետք, 4 օգնական ինչի՞ է պետք։ Ես այս թվերը համեմատում եմ վարչապետի աշխատակազմի հետ։ Վարչապետն ունի վճարովի հինգ խորհրդական։ Եթե մի ժամանակ Տարոն Մարգարյանին էինք ասում էսքան խորհրդական ու օգնական ունես, օպտիմալացման տեղ կա... ի դեպ ձեզ ասեմ, ամեն խորհրդականի հասնում է մի գործավար, մի վարորդ, մի մեքենա ու բնականաբար էս ամեն ինչը մի մեծ թիվ է կազմում քաղաքի համար»,-ասաց ընդդիմադիր խմբակցության անդամը։

Նշենք, որ առաջարկվող օրինագծով քաղաքապետի աշխատավարձն ավելանալու է ավելի քան 100 տոկոսով՝ 575 հազար դրամից դառնալով 1 մլն 200 հազար դրամ։

«Ստացվում է, որ ԱԱԾ պետը, ոստիկանապետը, ՊԵԿ ղեկավարը, ՊՎԾ պետը, Վերաքննիչ և Վճռաբեկ դատարանների նախագահները ստանալու են ավելի քիչ աշխատավարձ, քան քաղաքապետարանի աշխատակազմի քարտուղարը»,-համեմատեց նա ու անտրամաբանական համարեց նման բարձրացումը։

Աշխատավարձերի բարձրացման դեպքում քաղաքի բյուջեի վրա ավելանալու է տարեկան 2 մլրդ դրամ բեռ։

«Երկու մլրդ դրամով այս պահին կարելի է իսպառ լուծել չորրորդ կարգի վթարային շենքերի բնակիչների վերաբնակեցման խնդիրը։ Մի շենքը կարելի էր կառուցել 1.5 մլրդ դրամով։ Հիմա իրենք ասում են, որ մենք այդ գումարները վերցնում ենք պարգևավճարների համար հատկացումներից։ Սա մանիպուլյացիա է, նախ պարգևավճարների ծավալը մեծացրեցին 1 մլրդ 200 մլն դրամով,  կանաչապատման, վերելակների, տրանսպորտի համար նախատեսված գումարները նվազեցրեցին, ո՞ւր պետք է հասնենք։ Եթե եկամուտները աճեին, ես կհասկանայի, բայց թերհավաքագրում է տեղի ունեցել նույնիսկ հարկերի ու տուրքերի բարձրացման պարագայում։ Ստացվում է, որ քաղաքապետը պետք է 7 խորհրդական պահի, չորս օգնական պահի, մամուլի քարտուղար ունենա, որն ավելի շատ աշխատավարձ է ստանում, քան պատգամավորը, ոը դրա համար վճարեն հարկատուները, և դա նվազեցվի քաղաքի գումարներից»,-մանրամասնեց նա։

Խաժակյանի մյուս հիմնավորումները՝ տեսանյութում։