Ձեր վստահելի աղբյուրը

«Բրյուսելում Ադրբեջանի նախագահ Իլհամ Ալիևի հետ հանդիպում նախատեսված չէ, բայց ենթադրվում է, որ տեսնենք, կշփվենք, երկու բառ կխոսենք»,- ասուլիսում հայտարարեց ՀՀ վարչապետ Նիկոլ Փաշինյանը՝ պատասխանելով հարցին, թե հաջորդ շաբաթ Բրյուսելում «Արևելյան գործընկերության» տասնամյակն է նշվելու, արդյո՞ք նախատեսված է հանդիպում Ադրբեջանի նախագահ Իլհամ Ալիևի հետ։

Նա նշեց, որ  շփում հիմա էլ կա։

«Եթե հիմա միջնորդավորված շփվում ենք, հանդիպենք, ինչու չենք կարող երկու բառ խոսել»,-ասաց Փաշինյանը:

Վարչապետը տեղեկացրեց, որ հոկտեմբերի 1-ին Եվրասիական տնտեսական միության Բարձրագույն խորհրդի նիստին մասնակցության համար սպասվում է ՌԴ նախագահ Վլադիմիր Պուտինի այցը Երևան: Նա նշեց, որ Հայաստան կժամանեն ԵՏՄ անդամ երկրների նաև այլ ղեկավարներ:

Պատասխանելով հարցին, թե ՀՀ Սահմանադրությամբ երկրի նախագահն արտաքին քաղաքականություն վարելու լիազորություն չունի, նախագահ Արմեն Սարգսյանը օտարերկյա այցեր է իրականացնում, միջազգային հյուրեր ընդունում, այդ ամենը սպասարկում է ԱԳՆ-ն և դիվանագիտական կորպուսը, նաև մամուլում լուրեր կան, որ նախագահականի և կառավարության միջև փոքր-ինչ լարվածության կա, արդյո՞ք ճիշտ են այդ խոսակցությունները, Ն. Փաշինյանը պատասխանեց. «Հայաստանում արտաքին քաղաքականությունը մշակում և իրականցնում է կառավարությունը: Բոլորը, այդ թվում նախագահը, երբ արտաքին քաղաքական որևէ գործունեություն է ծավալում, պետք է համաձայնեցի վարչապետի և կառավարության հետ, որից հետո միայն կարող է այդպիսի գործունեություն ծավելել։ Ամեն ինչ հենց այդպես էլ կա»։