Ձեր վստահելի աղբյուրը

Խորհրդարանում կառավարության հետ հարցուպատասխանի ժամանակ «Լուսավոր Հայաստան» խմբակցության պատգամավոր Արման Բաբաջանյանը վարչապետ Նիկոլ Փաշինյանից հետաքրքրվեց այսօրվա ասուլիսում նրա արած այն հայտարարությունից, որ նախորդ տարի ԱԱԾ-ում կարևոր փաստաթղթեր են ոչնչացվել և ծառայողական քննություն է ընթանում։

«Շատ հետաքրքիր է, ե՞րբ եք պարզել, որ այդ նյութերը ոչնչացվել են, ինչու՞ քրեական գործ հարուցված չէ, և ինչու՞, օրինակ Կուտոյանը բանտում չէ»։

Փաշինյանը պատասխանեց, որ ամսաթվով չի կարող ասել, թե կոնկրետ որ օրն են հայտնաբերել, բայց նախորդ տարի ամռանն են հայտնաբերել, սկսվել է ուսումնասիրման գործընթացը։

«Անկեղծ ասած՝ շատ դժվար էր հավատալ, որ նման բան հնարավոր է, և բավականին երկար ժամանակ ուսումնասիրվում էր, թե ինչու տեղում չեն այդ փաստաթղթերը։ Երևի նույնիսկ սխալ է ասել ոչնչացվել, ավելի ճիշտ կլինի ասել՝ տեղում չեն, քանի որ կարող է վառվել են, կարող է ուրիշ տեղ պահվել են կամ ոչնչացվել են, չգիտեմ, ինչ-որ բան տեղի է ունեցել։ Պետք էր համոզվել, որ մենք ճիշտ ենք հասկանում իրավիճակը և դրա համար ծառայողական քննություն է իրականացվել։ Հավանական եմ համարում, որ փաստի առթիվ քրգործ կհարուցվի, տեղի կունենա համապարփակ քննություն, իսկ ով բանտում կհայտնվի-չի հայտնվի, այդ հարցերով իմ դիրքորոշումը գիտեք»,- ասաց վարչապետը։

Բաբաջանյանը հարցրեց. «Կասկածներ ունեք, որ նյութերը առնչվում են Մարտի 1-ին, թե ունեք այդպիսի տեղեկություններ, որ դրանք այլ գործերին են վերաբերում»։

Ի պատասխան Փաշինյանն ասաց. «Դրանք լայնածավալ շրջանակի են առնչվում, ինչն ակնհայտ է, ավելի մանրամասն չեմ կարող հաղորդել»։