Ձեր վստահելի աղբյուրը

Քննչական կոմիտեն միջնորդություն է ներկայացրել, որ Travelan  տուրիստական ընկերության  տնօրենի Ա. Ս.-ին կալանավորելու վերաբերյալ։ Այս մասին Panorama.am-ին հայտնեցին քննչական կոմիտեից։ Որպես խափանման միջոց այս պահին ընտրված է ստորագրությունը չհեռանալու մասին:

Հիշեցնենք, որ Travelan  տուրիստական ընկերության  տնօրեն Ա. Ս.-ն բազմաթիվ քաղաքացիներից գումարներ է վերցրել, սակայն դրա դիմաց որևէ ծառայություն չի մատուցել։ Նա նախկինում աշխատել է «Երևան թրավել» ընկերությունում՝ որպես վաճառքի գծով մենեջեր։

Այստեղ էլ նա գումարներ է յուրացրել։ Ա. Ս.-ին մեղադրանք է առաջադրվել այն բանի համար, որ վերջինս 2018 թվականի հունվարից մինչև սեպտեմբերն ընկած ժամանակահատվածում, կազմակերպության անունից ամրագրումեր է կատարել ՀՀ-ում գործող տարբեր հյուրանոցային և ռեստորանային համալիրներում։

Դրանց  դիմաց քաղաքացիներից կանխիկ և անկանխիկ եղանակով մաս-մաս ստացված, ընդհանուր առմամբ խոշոր չափի 9 միլիոն 610 հազար 515 դրամը հանելով տուրիստական կազմակերպության ֆոնդից, ընդգրկել է իր գույքային ֆոնդում։

Դիտավորությամբ յուրացրել է նշված գումարը, այդ կերպ ընկերությանը պատճառելով առանձնապես խոշոր չափի գույքային վնաս: Նրան մեղադրանք էառաջադրվել ՀՀ քրեական օրենսգրքի 179-րդ հոդվածի 3 մասի 1-ին կետով։

Քրեական օրենսգրքի 179-րդ հոդվածի 3 մասի 1-ին կետը սահմանում է. «Յուրացնելը կամ վատնելն առանձնապես խոշոր չափերով պատժվում է ազատազրկմամբ` հինգից ութ տարի ժամկետով` գույքի բռնագրավմամբ կամ առանց դրա»։