Ձեր վստահելի աղբյուրը

Ազգային ժողովը քննարկում է  «ՀՀ հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագիծը։

Նախագծի հիմնական զեկուցող Բնապահպանության նախարար Էրիկ Գրիգորյանը նշեց, որ ՀՀ կառավարությունն առաջարկում է ավելացված արժեքի հարկից ազատվող ցանկում ներառել էլեկտրական շարժիչով ավտոմեքենաների ներմուծումը կամ օտարումը մինչև 2022 թվականի հունվարի 1-ը։

Նրա խոսքով՝ նախագծի նպատակը բնապահպանական է, միտված է շրջակա միջավայրի աղտոտման նվազեցմանը. «Նախագծի ընդունումը կխթանի նաև ՀՀ էներգետիկ անվտանգություն, նախադրյալներ կստեղծի այս ոլորտի բարձր տեխնոլոգիական զարգացման համար»։

«ՀՀ-ն, ի տարբերություն եվրոպական երկրների,  բավական սահմանափակ թվով է նման մեքենաներ ներմուծում: Օրինակ՝ հարևան Վրաստանը նախատեսում է առաջիկա 10 տարում ծավալը 90 տոկոսի հասցնել: Այս նախագծի ընդունումը ոչ միայն բնապահպանական է, այլ նաև տնտեսական և սոցիալական նշանակություն ունի»,- հավելեց նա։

Նախարարը նշեց, որ Բնապահպանության նախարարության աշխատակազմում գտնվող մեքենաների մեծ մասը կրճատվել է ընդհանրապես, իսկ էլեկտրամոբիլների ներդրման հարցում միացել են  գլոբալ էլեկտրիկ մոբիլիթի գործընթացին, որը իրականացվում է ՄԱԿ-ի բնապահպանական ծրագրի ներքո։

«Ունենք համապատասխան դրամաշնորհային գումարներ՝ մոտ 700 հազար դոլար և ներկայացրել ենք ծրագիր, որը կլինի աշխարհում առաջինը, և որ ամբողջ կառավարությունն անցնի էլեկտրամեքենաների»,-ասաց նա։