Ձեր վստահելի աղբյուրը

Մոր և մանկան առողջության պահպանման գիտահետազոտական կենտրոնում այս տարի առաջին եռյակն է լույս աշխարհ եկել՝ Նարեն, Նարեկն ու Նարինեն։ Երեքն էլ առողջ են ու նորմալ քաշեր ունեն՝  1 կգ 700 գրամ-1 կգ 800 գրամ։ Ապրիլի 19-ին լույս աշխարհ եկած բալիկները դեռ դուրս չեն գրվել,  քաշ են հավաքում բժիշկների հսկողության ներքո։ Տանը նրանց սպասում է ավագ եղբայրը՝ մեկ ու կես տարեկան Մանուկը։


 Նարեն, Նարեկն ու Նարինեն։

Մեր այցելության պահին Մանուկը, հայրիկն ու տատիկը եկել էին մայրիկին ու փոքրիկներին տեսակցության։ Եղբայրը դեռ միայն լուսանկարներով է ծանոթացել փոքրիկների հետ, նրան վերև բարձրանալ չի կարելի։



Էլվինան, ամուսինը՝ Սմբատը և նրանց ավագ որդին՝ Մանուկը։

Երեխաների մայրը  Էլվինա Գաբրիելյանն է։ Նա  20 տարեկան է ու արդեն չորս երեխայի մայր։  Սովորում է Հայկական պետական մանկավարժական համալսարանի  Սկզբնական կրթության ֆակուլտետի հեռակա բաժնում։ 

Panorama.am-ի հետ զրույցում պատմում է, 18 տարեկան դառնալուն պես ամուսնացել է, նույն տարում էլ ծնվել է առաջնեկը։ 20 տարեկանում արդեն չորս երեխայի մայր է։

Երկրորդ հղիությունն էլ բնական բեղմնավորման արդյունքում է եղել։ Արմավիրում ապագա մայրիկին ու հայրիկին հայտնել են՝ եռյակի են սպասում։ Հղիության ընթացքում կինը հսկողության ներքո է եղել Մարգարյան հիվանդանոցում։

Արմավիրի մարզի Նոր Արմավիր գյուղում ապրող Թովմասյանների տանը մեծ ուրախություն է։ Տատիկն ու պապիկը արդեն վեց թոռնիկ ունեն։

Վաղաժամ ծննդաբերության ու մայրիկի՝ պաթոլոգիայում անընդհատ պառկած լինելու պատճառով չեն հասցրել պատշաճ պատրաստվել նորածիններին դիմավորելու համար, օրորոցները դեռ չեն գնել, կիսատ-պռատ բաներ են մնացել։ Մանուկն արդեն մեծ է,  նախատեսել են, որ որոշ ժամանակ կտեղափոխվի հորեղբոր սենյակն ու իր օրորցը կտա փոքրիկներին, մինչև...

Էլվինան վախկոտ չէ, բնույթով ակտիվ է, երիտասարդ մայրիկը դեռ մի բան էլ օգնում  է նույն հիվանդասենյակի մյուս մայրիկներին, հարկ եղած դեպքում նաև նրանց փոքրիկներին է խնամում։ Տատիկը մտավախություն ունի, չի պատկերացնում, թե ինչպես են հասցնելու խնամել փոքրիկներին։ Ասում է, լավ կլիներ պետությունը մի դայակ իրենց տրամադրեր՝ իրենց օգնելու համար։

«Մեծ երեխան մեկ ու կես տարեկան, մայրը ուսանող, ընդունվել է, պետք է շարունակի ուսումը։ Մի օգնող տրամադրեին, լավ կլիներ»,-անկեղծանում է նա։

Ընտանիքի հայրը՝ 33-ամյա Սմբատը պարապ չի նստում։ Պատվեր լինելու դեպքում վերանորոգման աշխատանքներ է անում։ Այս պահին գործ չունի, ամեն օր Երևան է գալիս՝ կնոջն ու երեխաներին տեսակցության։

Էլվինան, ով երևի Հայաստանի ամենաերիտասարդ մայրիկն է ու ամենաբազմազավակ ուսանողը, առայժմ շնորհավորանքներ չի ստացել ոչ աշխատանքի և սոցիալական հարցերի նախարարությունից, ոչ մարզպետարանից, ոչ գյուղապետարանից ու ոչ էլ բուհի ղեկավարությունից։

Մտադիր է ուսումն անպայման շարունակել։ Քանի որ առջևում միջանկյալ քննություններն են մի քանի առարկաներից,  Էլվինան հիվանդասենյակում էլ է դրանց պատրաստվում, ազատ պահերին անընդհատ կարդում է ու ռեֆերատը գրում։ Այն մանկավարժության պատմություն առարկայից է, Հելլենիստական շրջանի մասին։

«Հիմա իմ վարձը 50 տոկոսով զեղչված է։ Քանի որ մեր ընտանիքի ծախսերը կավելանան, շատ կուզեի, որ մնացած 50 տոկոսն էլ չվճարեի։ Կդիմեմ ռեկտորարտին, տեսնեմ՝ ոնց կլինի»,-ասում է ուսանող մայրիկը։

Գիտահետազոտական կենտրոնի բժիշկներն ու մասնագետները  գոհ են երեխաների վիճակից ու գրանցվող դինամիկայից՝ արագ ապաքինվում են, աշխուժացել են ու նույնիսկ  քաշ հավաքել։

«Լույս աշխարհ են եկել 33-34 շաբաթականում, հրատապ կեսարյան հատման միջոցով, եռյակների համար բավականին լավ քաշ ունեն։ Առողջ են։ Մայրիկը բալիկներին կերակրում է միայն կրծքի կաթով, հավելյալ սնուցում չեն ստանում, ինչը եռյակների պարագայում հազվադեպ բան է։ Աղջիկներն ավելի շուտ ապաքինվեցին»,-ասաց Մոր և մանկան առողջության պահպանման գիտահետազոտական կենտրոնում բժիշկ-նեանոտոլոգ Մարինա Զարգարյանը։

Նա նշում է նաև բաժնի վարիչի՝ Անահիտ Ասատրյանի, բուժող բժկի՝ Հրանուշ Բախշյանի անուններն ու փաստում, բալիկների հետ կապված հաջողությունները թիմային աշխատանքի արդյունք են։