Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի դատական նիստն ընթանում է լեփ լեցուն դահլիճում։ Ռոբերտ Քոչարյանն ու նրա պաշտպաններն առաջարկեցին կամ ավելի մեծ դահլիճ տեղափոխվել կամ էլ արտագնա նիստ անցկացնել։

Փաստաբաններից Հայկ Ալումյանը նկատեց, դատավորը հայտարարել է, որ դատական նիստը դռնբաց է, սակայն կարգադրիչները փակել են դատարանի մուտքի դուռն ու թույլ չեն տալիս մարդկանց ներս մտնել։

«Դռնբաց լինելը ձևական է, կա՞ հնարավորություն, որպեսզի նիստին ավելի շատ մարդիկ ներկա լինեն»,-ասաց փաստաբանը։

Ի պատասխան դատավորը հայտարարեց՝ կարգադրիչները չպետք է խոչընդոտեն մարդկանց մուտք գործել դատարան, ինչից հետո մի քանի մարդ ներս մտավ դահլիճ։ Նիստն ընդհատվեց  դահլիճում ներկաների ծափահարություններով ու «ազատություն, ազատություն» բացականչություններով։

Դատավոր Դավիթ Գրիգորյանը հայտարարեց, որ դատարանը թույլ է տալիս դատարանի դահլիճից ուղիղ հեռարձակմամն լուսա- և տեսանկարահանումներ իրականացնել։

Դատավորը հայտնեց նաև, որ դատարանը, հաշվի առնելով, որ միայն Ռոբերտ Քոչարյանն է գտնվում կալանքի տակ, ծանուցել է միայն նրան, նրա պաշտպաններին և մեղադրող դատախազներին։

«Դատական այս նիստը հրավիրվել է Սահմանադրական դատարանի որոշման հիման վրա, կարծում եմ, տեղյակ եք։ ՍԴ որոշման տրված չափորոշիչները հետևյալ են՝ դատական նիստի քննարկման բուն առարկան լինելու է որպես խափանման միջոց ընտրված, երկարացված կալանավորման պահպանման, փոփոխման կամ վերացման հարցը։ Քանի որ սույն գործով միայն մեղադրյալ Քոչարյանն է գտնվում կալանքի տակ, ծանուցվել են միայն նա, նրա պաշտպաններն ու մեղադրող դատախազները»,-մանրամասնեց դատավորը։

Դատավորը պաշտպաններից հետաքրքրվեց, ունե՞ն ինքնաբացարկի միջնորդություն դատավորի վերաբերյալ։ 

Ռոբերտ Քոչարյանի փաստաբաններից Ալումյանն էլ  տեղին հետաքրքրվեց, թե  ինչու  գլխավոր դատախազը ներս մտավ դատավորի ծառայողական մուտքից, եղե՞լ է դատավորի հետ նույն սենյակում, կաբինետում, ունե՞ն ինչ-որ արտադատական հարաբերություններ, ասաց՝ չի բացառվում, որ դատավորի ու դատախազի միջև ինչ-որ շփում եղել է։

«Ոչ, դատարանը որևէ տեղեկություն չունի Ձեր հարցի հետ կապված։ Մեր միջև չկան նման հարաբերություններ։ Դատավորը պարտավոր չէ հետևել, թե ով որտեղից ներս կմտնի դահլիճ»,-ասաց դատավոր Գրիգորյանը։

Գլխավոր դատախազ Արթուր Դավթյանը պնդեց, թե՝ այո, դատավորը տեղյակ չէ։

Ալումյանը փոխադարձաբար պնդեց հարցերը, նկատեց, որ դրանք կարող են լինել ինքնաբացարկի հիմք, այն կապված է ոչ թե դատավորի, այլ դրսևորումների հետ։

Ալումյանը հետաքրքրվեց, թե ինչպես է գործը մակագրվել հենց այս դատավորին, ինչքանո՞վ է ծանոթ գործի նյութերին։

«Սույն հարցի քննարկման որոշ նյութերին ծանոթ եմ»,-ասաց դատավորը։

Ալումյանն ասաց, իրականությանը չի համախատասխանում նրա ասածները, դատավորը ոչ ճիշտ տեղեկություններ է հայտնում դահլիճում։

«Դա Ձեր սուբյեկտիվ կարծիքն է։ Կոչ եմ անում Ձեզ, որ դատարանի հասցեին վիրավորական, անաչառության ու անկախության սկզբունքների խախտման առումով արտահայտություններ չօգտագործեք, դիմում եմ Ձեզ, որպեսզի պահպանեք էթիկայի կանոնները, պարոն Ալումյան»,-ասաց դատավորը։

Ալումյանն էլ նկատեց, չանել այնպիսի բաներ, որից կտուժի դատարանի հեղինակությունը։
Դատարանը հինգ րոպե ընդմիջում հայտարարեց՝ հնարավորություն տալով պաշտպանական կողմին ինքնաբացարկի հետ կապված որոշման ճշգրտման համար։

Ընդմիջումից հետո Ալումյանը ևս մի քանի հարցեր ուղղեց դատավորին, ապա խնդրեց ընդմիջում տրամադրել։ Այս պահին դատական նիստը 40 րոպեով ընդմիջվել է։ Դատարանը ժամանակ է տվել պաշտպանության կողմին՝ դատարանին գրավոր կերպով ինքնաբացարկի միջնորդություն ներկայացնելու համար։

Նշենք, որ նիստում բացի գլխավոր դատախազից մեղադրանքը պաշտպանելու համար դատարան ներկայացել են դատախազներ Կարեն Բիշարյանը, Պետրոս Պետրոսյանը և Գևորգ Բաղդասարյանը։