Առաջին անգամ կներկայացվեն Թումանյանի անձնական հավաքածուից հազվագյուտ ցուցանմուշներ

Մշակույթ 11:12 14/05/2019 Հայաստան

Առաջին անգամ կներկայացվեն Թումանյանի անձնական հավաքածուից հազվագյուտ ցուցանմուշներ

Հայ հանճարեղ բանաստեղծ Հովհաննես Թումանյանի ծննդյան 150-ամյակի հոբելյանական հանդիսությունների շրջանակում գրողի երևանյան թանգարանը Հայաստանի ազգային արխիվի հետ համատեղ կազմակերպում է «Ավանդ սերունդներին. պատմության գիտական հիշողություն» խորագրով ժամանակավոր ցուցադրությունը, որի բացումը տեղի կունենա այսօր:

Թանգարանի ֆեյսբուքյան էջից տեղեկանում ենք, որ ցուցահանդեսում ընդգրկված կլինեն Թումանյանի ընտանիքի կողմից ազգային արխիվին հանձնված բացառիկ և հազվագյուտ քարտեզներ, որոնք բանաստեղծի անձնական հավաքածուից են: «Հին և Նոր Կիլիկիայի», «Երևանի և Ելիզավետպոլի», «Ղարաբաղի և հարող շրջանների», «Կովկասի խաղողի այգիների», քարտեզները, «Թիֆլիսի հատակագիծը», և ևս 28 անուն քարտեզագրության եզակի ու տարաբնույթ ցուցանմուշներ առաջին անգամ կներկայացվեն լայն հասարակությանը:

Ցուցադրության բաղկացուցիչ մաս կկազմեն թանգարանում պահվող բանաստեղծի անձնական գրադարանի կովկասագիտության բաժնի գրքերը, որոնք նույնպես նախկինում չեն ցուցադրվել: Դրանք տարբեր հեղինակների բազմաբնույթ գիտական ուսումնասիրություններ են, սոցիոլոգիական, ժողովրդագրական հետազոտություններ, հոդվածներ, ակնարկներ, որոնք բովանդակային առումով կլրացնեն այդ աննախադեպ ձեռնարկը: Ցուցադրությունը հնարավորություն կտա բացահայտելու Թումանյանի հետաքրքրությունների ևս մեկ կողմը, և թերևս ազդակ հանդիսանա երիտասարդ սերնդի համար՝ կարևորելու պատմական հիշողությունը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: