Ձեր վստահելի աղբյուրը

Երևանի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ նիստերը կշարունակվեն դռնբաց։ Դատավար Դավիթ Գրիգորյանը մերժեց դատախազության՝ նիստերը դռնփակ անցկացնելու միջնորդությունը։

Քոչարյանի փաստաբաններից Հայկ Ալումյանը ընդհատված տեղից շարունակեց միջնորդությունը։ Երբ հասավ փետրվարի 23-ին հրավիրված խորհրդակցության  վերաբերյալ հատվածին ու Արշակ Կարապետյանի տված ցուցմունքին, մեղադրող կողմը առարկեց, ասաց, ցուցմունքները մեջբերումներն արվեն մասամբ, ոչ թե ամբողջությամբ, քանի որ կողմերը, ինչպես նաև դատարանը ծանոթ են գործի նյութերին։

Դատավորը հայտարարեց, դատարանն ընդունում է առարկությունն այն իմաստով, որ ցուցմունքները չհրապարակվեն ամբողջությամբ, քանի որ դատարանը ծանոթ է նյութերին, եթե ցուցմունքնրը հրապարակվեն ամբողջությամբ, ապա նիստը ամիսներին կտևի։

Ալումյանը նշեց՝ կաշխատի սեղմ լինել, վկաներից միայն մի քանիսի մի քանի խոսքերին է անդրադարձել։

Մինչ Ալումյանը շարունակում էր ընթերցել Արշակ Կարապետյանի ցուցմունքը, դատախազը կրկին ընդհատեց, դատավոր Դ. Գրիգորյանն էլ Ալումյանին առաջարկեց իր կարծիքը հայտնել ցուցմունքների մասին, ոչ թե դրանք ներկայացնել։

«Հարգելի դատարան, ես եկել եմ իմ ձևով իմ խոսքը ներկայացնելու։ Ես մասնակցում եմ մի դատավարության, որտեղ մեղադրող կողմն ու դատարանն ինձ ասում են, թե ես իմ խոսքը ոմց կառուցեմ»,-ասաց Ալումյանն ու նկատեց, որ հենց Կարապետյանի ցուցմունքն է որպես հիմնավոր կասկած ներկայացվել դատարանին։

Կարապետյանն ասել էր, իր հիշելով հենց այդ խորհրդակցության ժամանակ, իր հիշելով, Ռոբերտ Քոչարյանը ասել է. «Այսօրվանից ժամը 00։00-ից հայտարարում եմ արտակարգ դրություն»։

Ալումյանը նշեց, որ ՀՀ երրորդ նախագահ Սերժ Սարգսյանը հերքել է Արշակ Կարապետյանի ցուցմունքը։ Այստեղ էլ դատախազը միջամտեց, հերքված ցուցմունքը ինչո՞ւ է հրապարակվում։

Այստեղ կարծիք հայտնեց մեղադրյալի կարգավիճակում գտնվող Ռոբերտ Քոչարյանը. «Մենք այստեղ ստիպված ենք լրացնել այն բացը, որը թույլ է տվել նախաքննության ընթացքում քննչական մարմինների կողմից։ Սրանք ցուցմունքներից մեջբերումներ են, քանի որ յուրաքանչյուր ցուցմունք մի քանի տասնյակ էջ է կազմում։ Սա մեջբերում է, եթե դուք մեջբերում ասելով հասկանում եք մեկ նախադասություն, ապա այդպես հնարավոր չէ արտահայտել ասելիքը»։

Նշենք, որ Արշակ Կարապետյանն  այժմ վարչապետ Նիկոլ Փաշինյանի խորհրդականն է։ Մամուլում գրվել է, որ գեներալ-մայոր Արշակ Կարապետյանը հեռացվել էր զբաղեցրած՝ ՀՀ զինված ուժերի գլխավոր շտաբի հետախուզության վարչության պետի պաշտոնից 2016 թվականի «ապրիլյան պատերազմից» անմիջապես հետո։

Ի դեպ, լուրեր եղան, որ Արշակ Կարապետյանը հենց այդ ցուցմունքներ տալու արդյունքում դարձավ վարչապետի խորհրդական։ Նա 2008-ին եղել է ՀՀ զինված ուժերի գլխավոր շտաբի հետախուզության վարչության պետ։