Ձեր վստահելի աղբյուրը

Երեկ քաղաքացիներից շատերը ստացել են այս հաղորդագրությունը։

Այսօր վաղ առավոտյան առաջին դասարան գնալ պատրաստվող երեխաների ծնողները կազմ ու պատրաստ համակարգչի դիմաց են եղել։ Սակայն գրանցման ընթացքը, ինչպես ցույց տվեց խմբագրության ստացած ահազանգերն ու սոցցանցերում քննարկումները, ամենևին հարթ չի եղել։ Եղել են հաջողակներ, որ երեխային կարողացել են իրենց ուզած դպրոցում գրանցել հաշված րոպեների ընթացքում, սակայն մեծ մասի մոտ դա տևել է մինչև մեկ ժամ, կան մարդիկ, որոնք ավելի քան 3 ժամ անց էլ չեն կարողացել գրանցել երեխային։ Ոմանք էլ իրենց երեխաներին մի քանի անգամ են  գրանցել։ Մի խոսքով, լարվածություն, նյարդային րոպեներ, շիլաշփոթ։

Panorama.am-ի հետ զրույցում Երևանի բնակիչ Ազնիվ Կարապետյանը պատմեց, ուղիղ ժամը 9-ին մուտք են գործել կայք՝ սկսելու գրանցումը։ Քանի որ ավագ որդին հաճախում է թիվ 130 դպրոց, կրտսեր երեխային էլ որոշել է այնտեղ գրանցել։

Ամեն անգամ համակարգն անհեթեթ պատասխաններ է տվել՝ մեկ իբր անհամապատասխանություն է եղել անուն-ազգանուն դաշտերում, մեկ էլ՝ իբր երեխան դպրոցահասակ տարիքի չէ։







«Ամեն նման պատասխանից հետո սթրես էինք ապրում, ես տեսնում են րոպեների ընթացքում այդ դպրոցում գրանցվողների թիվն ավելանում է ու շատ հնարավոր է, որ տեխնիկական խնդիրների պատճառով, ոչ մեր մեղքով, երեխան չկարողանա հաճախել այդ դպրոց»,-պատմում է քաղաքացին։

50 րոպե անընդհատ փորձերից հետո երեխայի գրանցումը կատարվում է։ Բայց կան քաղաքացիներ, որ չեն կարողացել իրենց ուզած դպրոցում երեխային գրանցել։ Ստացվելու է, որ ավագ երեխաներն այլ դպրոց են գնալու, կրտսերը՝ մեկ ուրիշ։  Բոլոր դժվարություններն էլ մնալու են ծնողների վրա։

«Դուք պատկերացրեք, աշխատանքից դուրս եմ գալիս, վազում եմ մի դպրոց, հետո մեկ ուրիշ, չգիտեմ էլ հաջորդ տարի կհասցնեմ գրանցել երրորդին այդ դպրոցներից որևէ մեկում, թե չէ։ Կարծես ամեն ինչ անում են մարդկանց դպրոցահասակ երեխաների ծնողների կյանքը բարդացնելու համար»,-դժգոհում է մեկ այլ ծնող։

Ավելի վաղ ԿԳՆ-ից հայտնել էին,  գրանցման դեպքում որևէ չափանիշ, ներառյալ բնակավայրին կամ աշխատանքի վայրին մոտ գտնվելու կամ տվյալ դպրոց հաճախող քույր կամ եղբայր ունենալու փաստը, չի կարող որևէ երեխայի գրանցման համար առաջնահերթություն ապահովել։

«Եթե ցանկանում եք, որ Ձեր երեխան սովորի հենց Ձեր նախընտրած դպրոցում, ապա հարկավոր է հնարավորինս շուտ գրանցվել առցանց համակարգի միջոցով, քանի դեռ տվյալ դպրոցի համար սահմանված տեղերը չեն սպառվել»,-ասել էին Կրթական տեխնոլգիաների ազգային կենտրոնից։

Ավելի ուշ գրանցվելու համար նախատեսված կայքը կախել է ու որևէ գործողություն չի կատարվել։ Նորարության մասին անընդհատ բարձրաձայնող ԿԳՆ-ն ստացվեց, ունքը սարքելու տեղն աչքն էլ հանեց։

Իրենց դժգոհությունների մասին ծնողներն ու քաղաքացիները մեկնաբանություններ են թողել նաև ԿԳ նախարար Արայիկ Հարությունյանի՝ կայքի իրազեկման մասին գրառման ներքո։

Նախարարությունում տեղյակ են խնդրին, նշում են պատճատը ծանրաբեռնվածությունն է։

«Էլեկտրոնային կառավարման ենթակառուցվածքների ներդրման գրասենյակի կենտրոնական հանգույցները ծանրաբեռնվածությամբ են աշխատում, այդ իսկ պատճառով բնակչության պետռեգիստրից քաղաքացիները ստացել են տարաբնույթ պատասխաններ, այն է՝ առկա է տարիքի անհամապատասխանություն, ծնող-երեխա կապ, մուտքագրված հանրային ծառայությունների համարանիշով տվյալներ չեն հայտնաբերվում:

Այս խնդրի հետևանքով մեկ քաղաքացու կողմից բազմակի գրանցումներ են տեղի ունեցել, այժմ համակարգը աշխատում է նման խնդիրները լուծելու ուղղությամբ: Ներկա պահին արձանագրված բոլոր խնդիրները օպերատիվ կերպով լուծվում են:

Ուշադրություն, եթե Ձեր հայտագրումը հաստատվել է, սակայն դեռ էլեկտրոնային նամակ չեք ստացել` մի անհանգստացեք, երեխան հայտագրված է: Նամակը 2-3 օրվա ընթացքում կստանաք»,-նշում են ԿԳՆ-ից։