Ձեր վստահելի աղբյուրը

Հայաստանի պետական սիմֆոնիկ նվագախումբն իր համագործակցությունն է սկսել երաժշտական միջազգային Only Stage գործակալության հետ։ Այսուհետև միջազգային երաժշտական հարթակներում Հայաստանի պետական սիմֆոնիկ նվագախմբին կներկայացնի Only Stage գործակալությունը։ Այս մասին հայտնում են Հայաստանի պետական սիմֆոնիկ նվագախմբի մամուլի ծառայությունից։

Հայաստանի պետական սիմֆոնիկ նվագախմբի տարեցտարի աճող միջազգային համբավը, դասական երաժշտության հեղինակավոր հարթակներում ձեռք բերած մեծ հետաքրքրությունն ու պահանջարկը, արտասահմանյան բազմաթիվ հրավերները հասցրել են գրավել նաև միջազգային գործակալությունների ուշադրությունը, իսկ Only Stage-ը եղավ առաջիններից, որը ցանկություն հայտնեց համաշխարհային հարթակում ներկայացնել նվագախումբը։

«Երաժշտական հեղինակավոր գործակալություններն աշխատում են բացառապես ճանաչված, կայացած ու կատարողական բարձր վարպետություն ունեցող նվագախմբերի և արտիստների հետ։
Համագործակցությունը երաժշտական աշխարհում մեծ ճանաչում վայելող Only Stage-ի հետ կօգնի Հայաստանի պետական սիմֆոնիկ նվագախմբին համաշխարհային երաժշտության ասպարեզում հասնել է՛լ ավել բարձր մակարդակի, ձեռք բերել նոր գործընկերներ, աշխատել լավագույն մենակատարների հետ, գրավել նոր լսարաններ, և իհարկե, աշխարհին լավագույնս ներկայացնել հայկական կատարողական արվեստն ու հայկական երաժշտական ժառանգությունը»,- հայտնում են նվագախմբից։