Ձեր վստահելի աղբյուրը

ՀՀ երկրորդ նախագահ, մեղադրյալի կարգավիճակ ունեցող  Ռոբերտ Քոչարյանն այսօր դատարանում հայտարարեց՝ մարտի 1-ի իրադարձությունների վերաբերյալ ԱԱԾ նախկին պետ Գորիկ Հակոբյանը տեսանյութեր է ցույց տվել մարտի 7-ին կամ 8-ին։

«Ես մինչև մարտի 1-ի իմ ասուլիսը զանգել եմ Գորիկ Հակոբյանին ու փաստեր ճշտել։ Այո, ինքն ասաց, զենք են կիրառում, նռնակներ, այդ դրվագն ինքն ինձ պատմեց, ասեց, մեքենայից դուրս է գալիս, կրակում, նորից է դուրս գալիս։

Երբ սկսեցին մամուլում քննադատել, թե այդպիսի բան չկա, անձամբ Գորիկ Հակոբյանը բերեց և իմ գրասենյակում ցույց տվեց տեսանյութը։ Այդ տեսանյութերն այսօր չկան, չգիտեմ, որտեղ են։

Բավական հետաքրքիր նյութ էր, թե ոնց է նռնակը պայթում, թե ոնց է դրա հետևանքով ոստիկանության կապիտանը զոհվում։ Այս ամբողջը նյութերում կար, այսօր չկա։ Հասկանո՞ւմ եք»,-ասաց Քոչարյանը։

Նա համոզմունք հայտնեց, որ ՀՔԾ-ի կողմնից ինչպես այդ, այնպես էլ բազմաթիվ նյութեր չեն կցվել գործին։ Հիշեցրեց, քանի որ ինքը ցուցմունք չի տվել, ներկայացնում է բանավոր։