Ձեր վստահելի աղբյուրը

Անշարժ գույքի կադաստրի կոմիտեի ղեկավար Սարհատ Պետրոսյանն այսօր կառավարության նիստից հետո լրագրողների հետ զրույցում ներկայացրեց երեք պատճառ, թե ինչու են հանրապետությունում անշարժ գույքի գները բարձրացել:

Առաջին պատճառն, ըստ նրա, Հայաստանում նախորդ տարի տեղի ունեցած քաղաքական փոփոխություններն են, որոնք հանրության ու բիզնեսի շրջանում սպասումներ են առաջացրել, ինչը, բնականաբար, ազդել է պահանջարկի վրա:

Երկրորդը հիփոթեքի շուկայի ակտիվացումն է: Սարհատ Պետրոսյանը հայտնեց, որ այսօր բանկերը 6.5 տոկոս տարեկան տոկոսադրույքով հիփոթեքային վարկեր են տրամադրում։

Երրորդն, ըստ նրա, այն է, որ կոռուպցիոն սխեմաների վերացման արդյունքում շատ ավելի հեշտ է դարձել շինարարական գործունեություն ծավալելը։ Ուստի, բազմաթիվ փոքր և միջին կառուցապատողներ, որոնք նախկինում միգուցե խնդիրներ ունեին, հիմա հեշտ թույլտվություններ են ստանում։ «Այսինքն՝ նոր խաղացողներ են ի հայտ գալիս»,- ասաց նա:

Հարցին, թե արդյոք մեծ է արտերկրում բնակվող հայերի թիվը, որոնք բնակարաններ են գնում Հայաստանում, Սարհատ Պետրոսյանն ասաց, որ Կադաստրն արել է նման մոնիթորինգ, բայց ինքը խնդրել է դադարեցնել այն։ 

«Ինչո՞ւ, որովհետև հատկապես երկքաղաքացիների քանակի աճը բերել է նրան, որ մեր պատկերը ճիշտ չէ։ Իհարկե հիշում եմ, որ վերջին թվերով դրսի հայերը ավելի շոշափելի մաս էին կազմում»: 

Նրա խոսքով՝ անշարժ գույքի գործարքների մեջ մեծ մասնաբաժին է կազմում բնակարանների առք ու վաճառքը, երկրորդ տեղում՝ առանձնատների, երրորդ տեղում՝ կոմերցիոն տարածքների վաճառքը:

Նրա ներկայացմամբ՝ անշարժ գույքի ամենամեծ պահանջարկը Երևանի Կենտրոն վարչական շրջանում է, հաջորդում են Դավիթաշեն, Արաբկիր, Քանաքեռ-Զեյթուն վարչական շրջանները: 

Անդրադառնալով հարցին, թե արդյոք  ճիշտ են այն պնդումները, որ Երևանի Կենտրոնում չարդարացված բարձր գներ են, Կադաստրի կոմիտեի ղեկավարն ասաց, որ շուկան է որոշում այդ գինը. «Նախկինում մենք ունեինք շենքեր, որտեղ այսինչ  կամ այնինչ պաշտոնյայի հարևանը լինելու համար կարող էին թանկ լինել։ Բնականաբար, հիմա նման բաներ չկան»։