Ձեր վստահելի աղբյուրը

«Անկեղծ ասած, սպասելի չէր, ուրախ եմ շատ»,- այս մասին ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ դատարանի որոշման հրապարակումից հետո լրագրողների հետ զրույցում ասաց  երկրորդ նախագահի ավագ որդին՝ Սեդրակ Քոչարյանը:

Արդեն դատարանի շենքից դուրս լրագրողներին նա ասաց , որ շատ արդար որոշում է։

Հարցին՝ բավարարո՞ւմ է Ձեզ այն, Սեդրակ Քոչարյանը պատասխանեց. «Այո, ամբողջությամբ»։

Ռոբերտ Քոչարյանի կրտսեր որդին՝ Լևոն Քոչարյանն էլ ասաց, որ իրեն բավարարում է դատարանի կայացրած որոշումը. «Այնքանով է բավարարել, որ հայրս հիմա պետք է դրսում լինի, բնականաբար, այդքանով բավարարում է»։

Հարցին, թե իր համար սպասելի՞ էր այդ որոշումը, նա նշեց, որ ինչ-որ առումով սպասելի էր՝ հաշվի առնելով Արցախի ներկա և նախկին նախագահների երաշխավորությունը։

Դիտարկմանը, թե մինչ այս պաշտպանները պնդում էին, որ ճնշում է գործադրվում դատարանների վրա, այդ պարագայում այս վճիռն ինչի մասին է խոսում, Լևոն Քոչարյանը պատասխանեց. «Շարունակությունը կտեսնենք, պրոցեսը չի վերջացել, դեռ շարունակվելու և և այդտեղ կհասկանանք ճնշում կա, չկա և մնացածը։ Արդեն այն, որ հայրս այսքան ժամանակ նստած էր, համարում ենք, որ ապօրինի էր»։

Ինչ վերաբերում է Ռոբերտ Քոչարյանի խափանման միջոցը փոփոխելու վերաբերյալ դատարանի հրապարակած որոշումից հետո նրա դեմ բողոքի ակցիա անցկացնող քաղաքացիների դժգոհություններին, Լևոն Քոչարյանն, ասաց, որ իր համար անհասկանալի է նրանց պահվածքը. «Չեմ հասկանում չարության իմաստը, մի բան է՝ երբ գալիս ես մի մարդու պաշտպանելու, որ դուրս գա, ազատության մեջ լինի, այլ բան է գալ, այդ պաստառները պահել, ուղղակի չեմ հասկանում իմաստը, բայց հասկանալով որտեղից է ուղղորդվում, հասկանում ենք»։