Ձեր վստահելի աղբյուրը

«Վարչապետ Նիկոլ Փաշինյանի երեկվա ելույթում երեք հիմնական մեսիջ տեսա, որ ինքը չի կարողանում վերահսկել դատարանները, Արցախի իշխանություններին և պատերազմի վտանգ կա, որի ընթացքում կարող է տարածքներ հանձնվեն։ Այս երեքը փաթեթավորվեցին և տեղավորվեցին մեկ ելույթի մեջ, սակայն սրանք իրարից անկախ բաներ են»,- այսօր լրագրողների հետ հանդիպմանն ասաց քաղաքագետ Աղասի Ենոքյանը։

Քաղաքագետի խոսքով, սակայն, սահմանադրորեն Փաշինյանը չպետք է վերահսկի դատարանները, նույնիսկ կարիք չկա, որ նա վերահսկի Արցախի իշխանություններին։

«Այստեղ ուրիշ խնդիր կա, այն է, որ մինչև հիմա Արցախի և Հայաստանի ղեկավարությունները միշտ ունեցել են նույն ծագումնաբանությունը՝ Արցախի հարցի պայքարում։ Հիմա Հայաստանում եկել է մի իշխանություն, որը կարծես կտրել է այդ գենետիկ կապը, դժվար է համադրում աշխատանքները, բայց պետք է փորձել համադրել»,- ասաց Ենոքյանը։

Ինչ վերաբերում է պատերազմի վտանգին, նա նշեց. «Ենթադրություն անել, որ Արցախի ղեկավարությունը կարող է սկսել պատերազմ, կարող է հողեր հանձնել և այդ ամենի մեջ մեղադրել Հայաստանի իշխանություններին, սա միայն անհեթեթություն է։ Այստեղ տրամաբանություն չկա, որ մարդիկ իրենց արյամբ ազատագրած հողերը կարող են զիջել թշնամուն զուտ նրա համար, որ դրա մեջ մեղադրեն Փաշինյանին։ Այս ամենը լուրջ չի, բայց փաթեթավորվեց մեկ ծանրոցի մեջ և սրան նախորդեց լուրջ շոուն՝ դատարանների մուտքերը փակելու, և այս ամեն ինչով փորձ է արվում սքողել այն, ինչ որ կատարվելու է Արցախում։ Ես համարում եմ, որ դատարանների հետ կապված գործողությունները թոզ փչել էր»։

Ենոքյանի կարծիքով՝ սա ձեռնտու է ներկա իշխանություններին, որոնք չեն կարողանում հասնել իրական արդյունքի, տնտեսական ու սոցիալական ռեալ հարցեր չեն կարողանում լուծել,  երկրորդ հեղափոխություն հայտարարելով՝ փորձում են շեղել ժողովրդի ուշադրությունը։

«Շարունակաբար նոր թշնամիներ են հայտարարում, քանի որ հեղափոխությանը միշտ ընդդեմ է պետք, այս անգամ ընդդեմը դատարաններն էին։ Ամբողջ գործադիր իշխանությունը գտնվում է Փաշինյանի ձեռքում, եթե դատարանների հետ կոնկրետ պրոբլեմներ կան, պետք է տրվեն կոնկրետ դատավորների անուններ, քրգործեր, բայց հայտարարել, որ դատարաններն այսպես, դատարաններն այնպես, անպատասխանատու է»,- նշեց քաղաքագետը։

Նա ընդգծեց, որ դատարանների դռները փակելու կոչ անելով՝ մարդկանց դրդում է հանցագործության, և այդ բոլոր մարդիկ, բացի Փաշինյանի կողքին կանգնելուն, ունեն նաև քրեական պատասխանատվություն. «Սրա հետ միասին, ցավոք, տեսնում ենք, որ չունենք ընդդիմություն»։

Անդրադառնալով ՀՅԴ գործիչ Հրանտ Մարգարյանի վրա հարձակմանն ասաց. «Սա սարսափելի բան է, սա մեկ տարվա հեղափոխականության ամենակարևոր արտահայտությունն էր»։

Ինչ վերաբերում է Արցախի նախագահ Բակո Սահակյանի ու «Իմ քայլը» խմբակցության հանդիպմանը, Ենոքյանն ասաց, որ այն փակ էր, շատ բան չի կարող ասել, բայց այդ հանդիպման իրական նպատակը կարող էր լինել այն, որ «պատերազմի հոտ են առնում են բոլորը և ինչպես կարելի է դրան դիմակայել»։

Անդրադառնալով ՀՀ երկրորդ նախագահ Ռոբետ Քոչարյանի գործի կասեցմանը՝ քաղաքագետը հավելեց. «Ի վերջո դա արվեց նրա համար, որ դադարեն քննարկումները, թե Քոչարյանին կարելի է դատել այն հոդվածով, որը որ ընդունվել է ավելի ուշ, քան տեղի են ունեցել այդ գործողությունները։ Հիմա ՍԴ-ն կտա եզրակացություն, խոհանոցային խոսակցությունները կդադարեն և կունենանք իրավական փաստաթուղթ»։