Ձեր վստահելի աղբյուրը

«Մեր սպասելիքներն ու ակնկալիքները չեն արդարացել։ Հայաստանի իշխանությունները չունեն երկրի զարգացման ծրագիր, տեսլական, պրոֆեսիոնալ թիմ երկրի առջև ծառացած խնդիրները լուծելու համար»,-Ազատության հրապարակում անցկացվող հանրահավաքում իր ելույթում հայտարարեց  ՀՅԴ Հայաստանի ԳՄ ներկայացուցիչ Իշխան Սաղաթելյանը՝ հիշեցնելով, որ ՀՅԴ-ն աջակցել ու ողջունել է հեղափոխությունը։

Նա ընդգծեց, ազգային միասնական օրակարգ ձևավորելու, հասարակությանը համախմբելու, հասարակական համերաշխություն հաստատելու, հայ ժողովրդի ներուժը կազմակերպելու և առաջ տանելու փոխարեն իշխանությունները շարունակում են աշխատել, ապրել, շնչել  և արտաշնչել անցյալով։

«Անցյալի մասին խոսելը հեշտ է ու անպատասխանատու, իսկ ապագայի մասին խոսելը դժվար է, պատասխանատու և հանձնառու»,-հայտարարեց կուսակցության գերագույն մարմնի ներկայացուցիչը, որ Փաշինյանի ղեկավարման օրոք մի քանի ամիս զբաղեցրել է Գեղարքունիքի մարզպետի պաշտոնը։

Ելույթ  ունեցողը նշեց, որ իշխանությունները ստացել են բարձր քվե երկրում տնտեսական, իրավական ու սոցիալական բարեփոխումներ իրականացնելու համար, սակայն այդ լիազորություններն օգտագործում են այլ ուղղությամբ։

«Զարմանալի ու անբացատրելի է 70 տոկոս քվե ստացած իշխանության ինքնավստահության պակասը, որը հաճախ դրսևորովում է իր մկաներն ու ուժը տեղի-անտեղի ցուցադրելով, «ասֆալտին փռել», «պատերին ծեփել» արտահայտություններով»,-նշեց նա։

Իշխան Սաղաթելյանն էլ կրկնեց կուսակից ընկերոջ կոչը։

«Մենք եկել ենք ասելու, եթե այսպես եք քայլ անելու, ավելի լավ է կանգ առեք, լրջանաք, հանգիստ նստեք տեղներդ և գործ անեք։ Դուք այլևս իշխանություն եք, դուխովի ժամանակն անցել է, դա այլևս ակտուալ չէ, ժամանակն է գործել խելքով և մտքով»,-ասաց Սաղաթելյանը, ինչին մասնակիցներն արձագանքեցին ծափահարություններով ու բացականչություններով։

ԳՄ ներկայացուցիչն անդրադառնալով դատաիրավական համակարգի վերաբերյալ վարչապետ Նիկոլ Փաշինյանի գնահատականներին, ասաց, այո, այդտեղ խնդիրներ կան, բայց պետք է լուծվեն Սահմանդրության տառին ու ոգուն համապատասխան, այլ ոչ թե սպառնալիքներով ու ամբոխավարությամբ։

«Այդ ճանապարհով երկիրը վերջնական կտանեք քաոսի»,-ասաց նա։