Ձեր վստահելի աղբյուրը

Մալայանի անվան ակնաբուժական կենտրոնում հիվանդների հետ կատարվածը քաղաքացիների մոտ եղած անվստահությունը մեծացրել է։ Հիվանդների կուրանալու մասին լուրի տարծվելուց  երկու շաբաթ անց էլ  հստակ պարզաբանված չէ, թե ինչ է եղել իրականում։

«Մալայանի հայտնի դեպքից հետո խուսափում եմ դիմել բժշկի, թեև ձախ աչքս անընդհատ ուռում է ու տակը սևանում է վերջերս։ Մտածում եմ՝ եթե Մալայանի ակնաբուժարանի նման մասնագիտացված կենտրոնում հիվանդները քիչ մնաց՝ կուրանան, եթե անմիջապես չհայտնեցին ու մի եզրակացության չեկան, թե ինչն էր պատճառը, եթե դեղատուն ու բժիշկ իրար կասկածի տակ դրեցին ու հետևություն դեռ չկա,... բա հիմա ի՞նչ անենք։ Մի առողջություն է մնացել, այն էլ վախվխում ենք ուրիշի ձեռքը հանձնել»,-ասում է խմբագրություն ահազանգած քաղաքացին։

Նա ուսումնասիրել է ԲԿ-ի ֆեյսբուքյան էջն ու միջադեպի վերաբերյալ որևէ տեղեկություն դեպքի մասին չի գտել։

«Խնդրում եմ հայտնել դեպքի զարգացումներից՝ ինչ որոշվեց, ինչ վիճակում են հիվանդները, եթե ձեզ ավելին է հայտնի, քան կարելի է գտնել Մալայանի ակնաբուժարանի անհոգ ֆեյսբուքյան էջում»,-գրել էր քաղաքացին խմբագրությանը հասցեագրված նամակում։

Avastin դեղամիջոցը, որի ներարկման հետևանքով ութ հիվանդ կորցրել էր տեսողությունը, 14 օր է՝ լաբորատոր փորձաքննության ընթացքում է։

«Արդյունքները դեռ չկան»,-հայտնեցին առողջապահության նախարարությունից։

Սա այն պարագայում, երբ մայիսի 10-ին Ա. Մալայանը Panorama.am-ի հետ զրույցում հայտնել էր,  որ օրվա ընթացքում՝ այսինքն մայիսի 11-ին, փորձաքննության արդյունքները պարզ կլինեն։

Դեղամիջոցի ներարկումից հետո պացիենտների մոտ ախտորոշվել էր հետսրսկումային ինֆեկցիոն ախտահարում։

Կենտրոնի ակնաբույժ Վահան Պապոյանը Panorama.am-ի հետ զրույցում հայտնեց, ներարկված ութ հիվանդների տեսողությունը բարելավվում է։

«Ոչ մի հիվանդի մոտ տեսողության կորուստ չկա։ Հիմա  նրանց աչքերի մեջ յուղ կա, ինչը որոշակի վաթարացնում է տեսողությունը։ Հետագայում՝ 2-4 ամսվա ընթացքում որ յուղը հեռացվի, իրենց տեսողությունն ավելի լավ կլինի։ Բայց ամենակարևորը, իրենց մոտ սուր ինֆեկցիոն վիճակն անցել է, էլ չկա»,-ասաց բժիշկը։

Պապոյանը հիշեցնում է, միջադեպի հետևանքով տուժած քաղաքացիներն ունեն շաքարային դիաբետ, տեսողությունը կվերականգնվի այնքանով, որքանով թույլ կտա հիվանդության հետևանքով վնասված  ակնահատակը։

Քանի դեռ կենտրոնի մասնագետները չունեն փորձաքննության արդյունքները, տնօրինության հրամանով հրաժարվել են Avastin դեղամիջոցից, օգտագործում են փոխարինող դեղեր՝ հիվանդների համաձայնությամբ։

Ինչ վերաբերում է դեղը ներկրած «Նատալի ֆարմ» ընկերության հայտարարությանը, որ դեղամիջոցը նախատեսված չէ ներարկման համար, բժիշկ Պապոյանն ասաց, այդ դեղի ներարկում արվում է ոչ միայն իրենց կենտրոնում, այլև Հայաստանի ու արտասահմանի տարբեր բժշկական կենտրոններում, այն կոչվում է դեղորայքի off-label օգտագործում։

«Այն բավականին տարածված է, բայց խնդիրներ չեն եղել։ Բարդության տոկոսը միշտ լինում է, ինչի մասին մենք տեղյակ ենք պահում հիվանդին»,-նշեց նա։

Մինչ պարզ կլինեն փորձաքննության արդյունքներն ու կբարելավվի  տուժածների տեսողությունը,  ոստիկանությունում  կատարվածի առթիվ հարուցվել է քրեական գործ, այն երեկ ուղարկվել է Քննչական կոմիտե։

«Հարուցվել է քրեական գործ Քրեական օրենսգրքի  279 հոդվածի 1-ին մասի հատկանիշներով։ Գործը  նոր է վարույթ ընդունվել»,-Panorama.am-ին ասաց կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը։

Գործով առայժմ կասկածյալ կամ մեղադրյալ չկա։

Հիշեցնենք, որ Քրեական օրենսգրքի 279 հոդվածի 1-ին մասը սահմանում է. «Սպառողների կյանքի կամ առողջության անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը կամ նշված ապրանքների, աշխատանքների կամ ծառայությունների` անվտանգության պահանջներին համապատասխանությունը հավաստող պաշտոնական փաստաթղթերն ապօրինի հանձնելը կամ օգտագործելը, եթե այդ արարքներն անզգուշությամբ վնաս են պատճառել մարդու առողջությանը պատժվում է տուգանքով` նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկմամբ` առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա»։